Bepelasarka sistem data e-Kasih prorgam tu ulih ngelempungka tating pengidup raban orang ke ditagitKUCHING: Bantu RM35 sehari nengah ‘Program Baucer Kerja’ (PBK) ti dikemata Opis Menteri Pengereja Pengawa dipuji sereta disukung beduduk ari ti ulih mantu ngangkatka tikas pengidup raban ti ditagit.
Program Baucer Kerja nagit raban orang ti bekereja di mengeri ti teulihka penatai pemisi kurang ari RM3,000 enggau sida ke nadai pengawa.
Nambahka nya, program nya mega mungkur orang ti kala kena jil, orang ti kala gian dadah, orang tuai, orang nyelai pendiau (OKU), Orang Asli enggau nembiak enda tetampungka pelajar.
Dalam ripot Bernama apin lama, Mandal Direktor Bagi Pengatur Pengereja Pengawa ba Opis Pengereja Pengawa Semenajung Malaysia (JobsMalaysia), Yusuff Harun madah, JobsMalaysia deka nentuka orang ti patut nerima bantu nengah Program Baucer Kerja nya bepelasarka sistem data e-Kasih.
Martha Erika Daniel, 26, lebuh ditanya bekaul enggau Program Baucer Kerja madahk program nya manah bendar dikena nulung ngelempungka tating pengidup orang ti kena bungkur projek nya.
Taja pan bisi bantu ari perintah, rayat tauka seberang sapa ti dibantu perintah nengah macham program nyangkaum Baucer Kerja enda patut semina bepanggai ba bantu nya aja.
“Program Baucer Kerja ti baru diberi kelala nya endang manah laban nya ulih ngelempungka pemerat tating pengidup raban orang ti kena bungkur program nya.
“Tambah mega tikas pengidup diatu majak tinggi lebih agi di mengeri dibandingka enggau di menua pesisir.
“Tang raban orang ti nerima bantu nengah program tu patut nemu sereta enda semina bepaut patung aja laban ti bisi nerima bantu ari perintah.
“Penerima patut ulih muka runding deka ngembuan juluk ngiga pengawa taja pan gawa nyambil ngambika sama ulih ngemansangka menua,” ku Martha madah ngagai pengarang berita.
Nambahka nya, Stephenie Yvonne Jatan, 27, lebuh ngenang pekara ti sama, iya madahka diri setuju enggau juluk perintah ti deka mantu rayat lebih agi sida ke seranta.
Ku iya, perintah nengah opis menteri ti bekaul patut ngiga jalai ti engkeman ngambika orang ke patut nerima bantu nya enda kena tinggal.
“Opis menteri anang enda ingat ukai semua orang tuai ti dipasuk dalam sistem e-Kasih nya nemu nulis tauka macha, nya alai bakani chara mantu orang tuai patut nerima bantu nya ngambika enda tinggal ari bantu.
“Ngagai orang ti gawa teulihka penatai pemisi kurang RM3,000 sebulan baka aku empu, program Baucer Kerja tu amat manah. Enti dikemeranka di Sarawak mega, tu udah ngelempungka tating pengidup rayat,” ku Stephenie.
Bepelasarka ripot Bernama, Yusuff madah, program nya deka dipun sereta dipenyadika bulan April tu ila.
Taja pia ku Yusuff, bantu nya enda diberi sepeneka ati. Sida patut bisi gawa nyambil ngambika bulih bantu nya.
“Raban nya patut ngiga pengawa nyambil dulu, lalu udah nya kitai meri bantu RM35 sehari.
“Bantu nya tau diambi ninting hari tauka diambi ujung bulan, nitihka guna.Taja pia nya bepanggai ba undang-undang pengereja pengawa kasar ti bekaul.