Anda di sini

JBS deka ngatur aum enggau perintah merambu palan lumba bemuto,ku Haris

Advertisement

SEDIA BERUNDING: Haris (enam kiba) begambar enggau raban komiti pengatur Karnival Lumba enggau Main Bemuto Nembiak Sarawak 2014.

KUCHING: Opis Nembiak, Lumba enggau Main (JBS) Sarawak besedia deka ngatur aum enggau Perintah Menua bekaul enggau perambu ngaga palan belumba kerita enggau mutosikal di Sarawak.

Direktor opis nya, Abdul Haris Ishak madah pengawa deka ngaga palan lumba nya begunaka mayuh proses peminta, nyengkaum minta pemendar ari Perintah Menua kelebih agi ngiga endur ke patut.

Udah nerima pemendar ari Perintah Menua, ku iya, nya baru JBS ulih minta ungkup ari Opis Menteri Nembiak enggau Lumba ngaga perengka guna nya.

“Kami deka baum enggau perintah menua kelebih agi dalam pekara ngiga endur nya.

“Enti udah dikemendarka, nya baru kami minta ungkup tauka geran ari KBS. Ngaga palan belumba begunaka mayuh atur,” ku iya madah ba aum media bekait enggau Karnival Lumba enggau Main Bemuto Nembiak Sarawak 2014 ditu, kemari.

Iya madah, bedau lama tu tadi, bisi sebuah palan belumba digaga di Kedah lalu ngarapka jemah ila, menua tu pan bisi palan lumba bansa nya.

“Tu berat kena beratika nembiak di menua tu bisi endur ke patut, ke ulih alai sida iya belumba,” ku iya.

Taja pia, Haris madah, opis nya deka ngaga mayuh agi atur pengawa karnival lumba engga main bemuto ke mega deka nyengkaum pengawa belumba.

“Pengawa bansa tu mega berat kena beratika nembiak kitai enda ngereja pengawa belumba enggau chara ke salah,” ku iya.

Advertisement