PATI MYANMAR NGIRAUKA ATI: Wan Junaidi nguji bejaku ngena perengka ari SARES.
KUCHING: Kenyau 21 Januari taun tu, ejensi penerit adat di serata menua udah mujur nangkap penyampau 2,919 rayat menua luar ti tama kitu ke nadai ngembuan dokumen pengelala diri ti sah (PATI) Ari penyampau nya, 2,390 iku lelaki, 443 indu lalu 86 iku nembiak mit ke dibai sekeda PATI ti udah bebini beranak.
Sapit Menteri Dalam Menua Datuk Dr Wan Junaidi Tuanku Jaafar madah, operasyen ke bepun kenyau ari 21 Januari 2014 tu tadi udah meresa 334 bengkah palan endur diau enggau gawa ke alai nengeri Selangor ngerikod pemayuh PATI ditangkap iya nya 635 iku.
“Naka kemari, 2 Februari 2014, operasyen ke dipejalaika opis imigresen nengah kerejasama mayuh ejensi ke bekaul udah nangkap 2,919 iku PATI.
“PATI ke ditangkap dinan ba 13 palan diserata menua lalu di Sarawak, kem Simuja enggau Bekenu udah penuh endur ngetanka sida.
Ari penyampau semua ke ditangkap, bansa Mynmar ke pemadu mayuh iya nya 3,984 iku lalu ditangkanka Indonesia 1,957.
“Iya ke lebih nya bansa Bangladesh, Nepal, India, Pakistan, Vietnam, Thailand, Cambodia, Filipina, Sri Lanka, Nigeria, Turki, China enggau bansa bukai.
Wan Junaidi mansutka jaku tu lebuh dikerandau pemberita di Opis Servis Parlimen Santubong, Jalai Kulas pengudah mendingka licha ari raban Sarawak Amateur Radio Emergency Service (SARES) ditu, kemari.
Iya ke mega Kaban Parlimen Santubong madah, semua ke ditangkap nya deka dianjung pulai ngagai menua asal dalam timpuh seminggu tu.
Ku iya, kitai deka ngenataika pekara tu ngagai opis kunsulat tiap menua ke bekaul lalu berandauka atur nganjung PATI pulai ke menua asal.
Kelimpah ari nya, Wan Junaidi madah, penyampau 174 iku PATI ditangkap di Sarawak ke alai 156 iku lelaki enggau 18 indu lalu iya nyadang mayuh agi deka ditangkap ketegal operasyen deka majak dipejalai.
“Dalam timpuh 21 ngagai 29 Januari tu tadi, kitai udah nganjung 1,239 iku PATI pulai ke menua asal lalu pengawa tu deka dipejalai tiap minggu ngambika palan endur ngenan puang lalu tau ngurangka kos ngintu sida baka belanja pemakai.
“Naka ke diatu sepenyampau 10,679 iku PATI bisi dinan dalam menua,”ku iya.
Iya mega madah, penyampau PATI di Malaysia udah bisi kurang ari ke udah tang pemayuh PATI bansa Myammar balat ngirauka ati.
Entara ejensi bukai ke enggau operasyen iya nya RELA, polis, JPAM, AADK, JPJ, JKM, JPN, SPRM enggau Media.