SRI AMAN: Menteri Muda Pemansang Menua Pesisir enggau Pengawa Berumah Sarawak, Datuk Francis Harden Hollis enggau raban iya udah ngulu pengawa Ngelalu Pengabang nyerumba Taun Baru China ngagai sekeda bala ketuai bansa China ditu.
Rumah ke bisi endur iya ngabang ensanus nyengkaum rumah Kapitan Chang Choon Lin ba Pasar Batu Lintang sereta rumah Pengulu Lee Tong Seng enggau Kapitan Bong Sii Teck di Pasar Lachau.
Lebuh berandau enggau pemberita Harden madah, pengawa ngabang maya sesebengkah pengerami tu patut dikemeran, ukai semina maya Taun Baru China aja, tang mega maya pengerami bukai.
Ku iya, nya ngelaika pupu raban bansa di menua tu bebasaka adat asal pangan diri nengah mayuh macham pengerami ke diintu di menua tu.
“Adat asal ke baka tu endang nyadi pematak temuai ngambika datai nemuai ngagai menua kitai tu, setipak enggau Taun Nemuai Ke Malaysia sereta Sarawak, 2014,” ku iya.
Sama bisai nyempulang iya, Kaban Parlimen Sri Aman, Masir Kujat, Pemesai Khas Masir, Edmund Pirang, Pemesai Opis Hal Ehwal Khas (JASA) Sarawak DUN Simanggang, Vincent Roy Muda, Pemantu Pemansang Mensia Mayuh (KEMAS) Sri Aman, Kelvin Lambai, Pengulu Micheal John Sanggop, Ketuai Indu Parti Rayat Sa’ati Sarawak (SUPP) Simanggang, Ling Siew Hung enggau Nembiak SUPP Simanggang, Patrick Micheal.