SRI AMAN: Menteri Muda Pemansang Menua Pesisir, Datuk Francis Harden Hollis madah, Mandal Chairman Parti Tindakan Demokratik (DAP) Sarawak, Leon Jimat enda berapa nemu sentang atur perintah bejalaika projek ngaga sepital baru Sri Aman.
Ulah Leon ti madahka pengawa ngaga sepital baru nya ‘sakit’, semina kena ngulihka publisiti murah ti pulaika penguntung politik iya empu aja.
Ketuai penyakal nya patut beratika dulu pemujur projek ngaga sepital nya diatu, sebedau ngemansutka sebarang penerang ba media.
“Penemu Leon nya nadai pengamat laban pengawa ngerata sereta nambun tanah ba palan endur ngaga sepital baru nya benung dipejalaika diatu,” ku iya seraya bebulaka jaku Leon ti madahka projek sepital baru Sri Aman ke beungkus RM200 miliun nya ‘sakit’ sereta nadai pemansang naka ke diatu.
Ku Harden, dokumen tinda ngaga sepital baru nya deka dikeluarka enti pengawa nambun tanah ba palan endur bejalaika projek nya udah tembu ila.
Iya melabaka dokumen tinda nya deka dikeluarka pun taun tu, ke alai seraban perunding teknikal ari Kuching deka datai meresa pengawa ngerata sereta nambun tanah ba palan projek nya
“Aku arapka rayat nemu projek sepital baru Sri Aman nya mengkang dipejalaika, lalu ukai ‘sakit’ baka ke disebut Leon,” ku iya.
Ku Harden, pagar ke rebah ba palan projek sepital baru ketegal perengka injin berat pemaju.
“Anang ngumbai projek sepital baru Sri Aman nya ‘sakit’ semina ketegal pagar ba palan projek nya rebah,” ku iya.