Taja hari dipeda manah tang ga hari tau bebali ngenyit, pangka gumbang ke bebesai tau ngaramka perau ke mit
KUCHING: Kepala Polis Sarawak Datuk Wira Mohd Sabtu ngelalau orang berikan nyikap diri enggau perengka pengelikun maya nurun ke tasik.
Ngenang senentang dua penusah perau karam ke nyadi kenaka Hari Lima enggau Empat tu tadi, iya madah taja pan gaya hari dipeda manah, alun umbak ba tasik tinggi lalu tau ngaramka perau ke mit.
“Aku ngelalau orang berikan nyikap diri enggau perengka pengelikun tubuh ke patut baka ke baju ‘jaket pengelikun’ sereta pelepuk maya nurun ke tasik tauka sungai.
“Gaya hari sereta alun umbak maya musin ke diatu tau bebali ngenyit lalu tau endar ngaramka perau ke mit,” ku iya lebuh dikerandau pemberita pengudah ngulu pengerami Rumah Tebuka Taun Baru China 2014 di Kompleks Polis Tabuan Jaya ditu, kemari.
Pengerami nya bela digulu Sapit Menteri Dalam Menua Datuk Dr Wan Junaidi Tuanku Jaffar.
Ba penusah ke nyadi Hari Empat tu tadi, perau empat iku orang berikan karam di Batang Rajang Sarikei ke alai dua iku ari sida selamat lalu dua iku agi dipelaba lemas. Naka ke kemari, tubuh seiku ke lemas bedau ditemu.
Selang Sehari (Hari Lima), seiku orang berikan dipelaba lemas pengudah perau ke ditepan iya enggau lima iku ke bukai karam di Nanga Sebelak Kabong, Saratok.
Operasi SAR ngiga tubuh dua iku di Sarikei enggau Saratok mengkang dipejalai.
Sepenyampau empat penusah perau karam udah dirikodka nyadi ba bulan Januari 2014.
Kelimpah ari nya, Sabtu madah opis polis deka nyadung broser bekaul enggau pengelikun maya di tasik.
“Aku udah merintah opis polis nyadung broser ba gena pengkalan perau. Ngarapka orang berikan meretika atur pengelikun sereta perengka pengelikun tubuh ke patut dibai.
“Kitai mega deka nentuka tiap pengekalan disikap enggau tanda pengelikun ngambika sida semampai bejejimat maya nurun berikan,” ku iya.