Anda di sini

Projek Impian S’wak nerima timbal manah ari rayat

Advertisement

KUCHING: Projek Impian Sarawak ti dipenyadika dalam bulan Oktober taun siti nyin tadi, majak nerima timbal ke manah ari mensia mayuh. Kelimpah ari nya penyampau mensia  mayuh ke ngerejister diri nyadi kaban baru Parti Tindakan Demokratik (DAP), pan majak nambah.

Chairman DAP Sarawak Chong Chieng Jen madahka, rayat udah berengkah nyebut sentang projek nya, kelebih agi kena ngintu nasit peranak menua pesisir.

“Timbal mensia mayuh ngagai projek tu manah amat, penyampau kaban ke ngerejister diri pan majak nambah.

“Ukai semina mensia mayuh aja bejaku sentang pekara tu, tang orang Barisan Nasional (BN) pan sama mega.

“Tu meh sebengkah ari chara kena ngaku utai ke dikereja kitai ngintu nasit peranak menua pesisir,” pia ku iya madah ngagai pemberita maya rumah tebuka Tahun Baru China di rumah iya kemari.

Ku iya, bisi semilan iti projek ari baruh inisiatif Impian Sarawak ke deka dipenyadika pun taun tu nyengkaum di Pakan, Kedup, Marudi, Batu Danau, Repok, Tarat, Bawang Assan, Kidurong enggau Lanang.

“Utai ti dipejalaika kami tu (Impian Sarawak) kena nentuka BN enda nempayaka pengundi di menua pesisir.

“Kelimpah ari nya, kami deka meda BN bejalaika tanggung pengawa nyadi perintah sereta ngemanahka perengkaguna ke bisi diatu,” ku iya.

Advertisement