KUCHING: Polis sereta perintah nemu sapa ke beempu tanggungpengawa betulis ke utai ti tau mai penyarut tauka laya bejaika bansa, pengarap tauka ngembuan ulah ngasut orang bukai kelebih agi dalam laman web Facebook.
Sapit Menteri Dalam Menua Datuk Wan Junaidi Tuanku Jaafar madah, bedau lama tu tadi, bisi laman web Facebook ke ngelar diri ‘Semenanjung Malaysia Anti Sabah Dan Sarawak’ ke bejaika mensia mayuh ari kededua buah menua Malaysia Timur (Sabah enggau Sarawak) ke bepengarap Keristin, sigi pengawa ke salah, lalu perintah deka ngambi atur ke terit enti ulah bansa nya ngeruga pengelikun menua.
“Kitai enda ulih milih kededua nya sekali. Enti kitai deka ke penyenang, kitai deka bulih penyenang nya….Nya pekara ke dipinta raban pengemeran media.
“Kami mega enda ulih nagang raban pengemeran media kitai ditu, nya alai kitai bisi penyenang ngereja pengawa nulis tauka naburka berita.
“Nya alai orang bejaku pasal pekara tu, begedika orang Keristin di kededua buah menua tu. Asal iya enda ngasut tauka bejai, raban pengemeran media peneka ati bejaku utai ke deka dikejaku ke sida iya,” ku Wan Junaidi.
Iya madah munyi nya lebuh dikerandau maya ngabang ngagai Rumah Tebuka Taun Baru China ba Indu Opis Parti Sa’ati Rayat Sarawak (SUPP) ditu, kena Hari Lima tu tadi.
Iya madah pengawa orang ke ngaga laman web Facebook bansa nya, ke deka mai penyarut sigi diperatika piak polis enggau ‘Special Branch’.
“Perintah nemu pasal pekara tu tang perintah pan bisi undang-undang dalam menua tu. Polis benung berati lalu ngiga sereta ngumpul bukti bekaul enggau pengawa sida iya.
“Polis bisi ngelalau pengempu laman Facebook nya, anang kelalu mantaika pekara ti tau ngeruga pengelikun menua enggau penyerakup bansa. Enda semua penyalah mesti ditangkap lalu dijil laban perintah enda ngemeratka pekara nya,” ku iya.
Nya alai, ku Wan Junaidi, lebuh polis diberi kuasa, mensia mayuh udah manjung dulu lalu nya kebuah mega perintah deka ngaga undang-undang ke terit agi tang taja pia orang mayuh ngenggaika nya.
“Nya alai kitai bisi undang-undang baka kediatu asal iya enda ngelui adan. Enti orang bejaku peneka ati sida iya, asal iya agi dalam konteks undang-undang menua, perintah agi ulih ngenatka nya, tang anang ngelui adan,” ku iya.
Tang enti udah ngelui adan, polis besedia nangkap orang nya.
“Laban kitai pan enggai meda menua kitai ke ngembuan mayuh macham pupu bansa enggau pengarap kitai nyadi charut.
“Nya alai, jaku lalau aku seagi-agi kita enda ditagang nulis blog tauka ‘Twitter’, anang sesekali ngelui adan nya,” ku iya.