KUCHING: Parti Tindakan Demokratik (DAP) Sarawak nagit ngulihka 100,000 iti sain jari rayat nengeri tu nengah kimpin sain jari polisi lekterik ke enda bechiping ati.
Chairman DAP Chong Chieng Jen madahka, kimpin nya deka dipejalaika ngelama tiga bulan, kena ngansak perintah nurunka rega lekterik 30 peresin ungkup genap iku peranak Sarawak.
Ku iya, pengawa ngurangka rega lekterik deka nyadi siti ari chara ngurangka tikas pengidup rayat ke majak tinggi diatu.
“Seiti ari chara ngurangka tikas pengidup rayat iya nya nengah chara ngurangka rega lekterik.
“Ba runding aku (ngurangka rega lekterik) siti ari chara ke mudah,” pia ku iya lebuh ke berandau enggau pengarang berita maya Rumah Tebuka Taun Baru China (TBC) ba rumah iya kemari.
Iya ke mega Kaban Parlimen Bandar Kuching madahka, diatu madahka genap iku rayat, pengilang tauka orang dagang amat begunaka lekterik.
Lekterik sebagi ari pengidup rayat. Ba runding aku, raban ke bekaul patut ngurangka rega lekterik enggau lengkas,” ku iya.
Berebak enggau nya, Kaban Kunsil Nengeri (ADUN) Kota Sentosa nya mega arapka SESCO ulih ngurangka penanggul lekterik di serata nengeri, ke suah endar nyadi dalam kandang dua taun ke udah.
“Aku arapka SESCO ulih bejalaika pengawa ngemanah nya suah agi lalu ukai semina ngemeratka pengawa ngaga tekad ai hidro,” ku iya.