KUCHING: Seiku ex-Pemesai Eksekutif Indah Water Ahmad Azizan Abdul Manan ngembuan juluk ati deka mantu ngemansangka peranak enggau sitak Bekenu.
Iya ke kala gawa ba Kuala Lumpur endang peranak asal ari menua Sarawak diatu nyadi seiku ari kaban nembiak ba Parti Demokratik Progresif Sarawak (SPDP).
Ahmad Azizan, 31, ngemeranka pengawa dagang kediri empu madah, nengah peneleba gawa ba Semenanjung Malaysia besemaya mantu parti ngangkat sereta ngemansangka sitak Bekenu di Miri.
Bisi pengerindu dalam politik, sereta ngangkatka bala nembiak di Sarawak, iya ngarapka peneleba nya deka mai ubah, ukai semina dalam peneleba teknikal tang dalam eknomi Bekenu, ku iya.
“Baka di Bekenu, ba penemu aku orang Melayu bisi penanggul dalam ngemansangka pengawa betanam betupi, orang Dayak betapi enggau tanah adat (NCR). Nya utai ke semak endar dalam ati aku, ngemansangka bansa Melayu enggau Dayak.
“Enti kitai nadai pengelandik dalam pengawa betanam betupi chara moden, bai orang ke landik ari Opis Menteri Betanam Betupi ngagai Sarawak ngelatih rayat ba sitak nya, beri lun tauka geran ngambika sida iya nyadi orang bumai ke landik kelimpah mutarka isu NCR enggau pengelandik,” ku Ahmad Azizan ke berasal ari Miri sereta bebansa Melayu/Melanau.
Iya madah munyi nya lebuh dikerandau di Rumah Tebuka Taun Baru China di rumah Sekretari Politik di Opis Kepala Menteri ti mega nyadi Sapit Sekretari Besai SPDP, Paul Igai di Jalai Bayor Bukit ditu, Hari Lima tu tadi.
Pasar Bekenu urung 40 minit penyauh ari Bandaraya Miri agi begunaka mayuh perengkaguna enggau atur pemansang ke bukai.
Nya alai, enti deka ngemansangka pasar Bekenu, pengelantang pendiau mensia mayuh ke diau di sitak nya mesti dikemanahka dulu, baru ulih ngemanahka perengkaguna bukai, ku iya.
“Perintah Menua enggau Perintah Besai ulih nulung ngangkatka pasar Bekenu ngambika nyadi menua industri manggai taun 2030,” ku iya.
Ahmad Azizan kala mantu indai iya, Datin Zainab Mahmud ngereja pengawa pengasih nengah ‘Pillar Foundation’ (sebuah gerempung mantu orang ke tasah) madah tiap bantu datai ari Opis Pengelantang Pendiau Raban Bansa endang mantu orang ke tasah.
“Kepala Menteri Pehin Sri Abdul Taib Mahmud kala madah, Sarawak deka nyadi sebuah menua industri manggai taun 2030. Nya alai, aku deka bebendar mantu ngemansangka sitak Bekenu kelimpah mantu ngangkatka tikas ekonomi nengeri,” ku iya ti mega nyadi seiku ari kaban Nembiak SPDP Pampang Bekenu.
“Enti ulih, semua parti politik enda ngira ari gempung Barisan Nsional (BN) tauka penyakal, badu agi charut bekenangka utai ke enda nguntungka rayat. Beratika pengawa kitai empu bakani ku kitai deka ngangkatka ekonomi rayat, ngurangka inflasyen lalu bakani ku kitai deka ngurang penanggul ke nuntung pengelantang pendiau rayat kemayahari tu…Ukai politik ke ngidupka kitai tang perut kitai mesti dijaga,” ku iya.
Lebuh ngenang jaku presiden parti, Tan Sri William Maawan Ikom, iya madah SPDP sigi deka ngangkatka bala nembiak lalu mai ubah dalam politik Sarawak.
“Nya alai aku minta semua komponen parti BN nitihka singkang presiden (Mawan). Enti deka ngemansangka Sarawak kitai patut mai mayuh agi bala nembiak.
“Enti kitai enda ngubah kitai empu, rayat deka ngubah kitai. Tulang belakang BN iya nya penyerakup dalam BN nyengkaum juluk ati Kepala Menteri,” ku iya.