AMPAU TBC: Fadillah (mua, dua ari kiba) begambar begulai enggau bala penerima ampau ba pengerami nyuaka pemeri TBC ngagai lebih 100 penerima di dewan SUPP Pampang Tupong ditu, ensanus. — Gambar Bernama
KUCHING: Ulah sekeda piak ke sengaja betalatka isu pengarap ba Sarawak semina deka ngiri pemenchi rayat pupu bansa ngambika enda nyukung perintah Barisan Nasional (BN) di nengeri tu, ku Chairman Raban Nembiak BN Sarawak Datuk Fadillah Yusof.
Ku iya, taja pan Kepala Menteri Pehin Sri Abdul Taib Mahmud enggau nyemetak madah rayat Sarawak enda ditagang milih jalai pengarap ti dikedekaka sida, tang bisi sekeda piak nguji mangkit isu tu ba nengeri tu.
Bejaku ngagai pemberita pengudah nyuaka pemeri Taun Baru China (TBC) ngagai lebih 100 penerima di dewan Parti Sa’ati Rayat Sarawak (SUPP) Pampang Tupong ditu, Fadillah madah baka nengeri bukai, Sarawak mega ngembuan undang-undang iya empu bekaul enggau atur milih sereta ngemeranka jalai pengarap.
“Nya semina main politik sekeda piak ke deka mangkit isu pengarap dikena sida ngiri pemenchi ngagai perintah (nengeri) Sarawak. Tu mega seiti ari isu ke sengaja dibangtaika sida kena napi pengawa bepilih nengeri di deka datai,” ku iya.
Fadillah madah munyi nya nimbal riput portal berita apin lama tu madahka BN Sarawak deka alah dalam pengawa bepilih nengeri ketegal isu pengarap, kelebih agi bekaul enggau isu leka jaku “Allah.”
“Nya kebuah sida mantaika isu tu enggau tuju ngiri pemecnhi ba raban pengemeran pengarap Keristin ngambika enda nyukung perintah BN. Nya aja, nadai kebuah bukai,” ku Fadillah, ke mega Menteri Kereja Raya Malaysia.
Ketegal dipadu nyadi Chairman Raban Nembiak BN Nengeri, Fadillah madah udah nyadi tanggungpengawa iya deka terus ngenukuka kaul rat dalam pupu raban bansa enggau pengarap di Sarawak semampai dijaga.
“Tu meh isu besai ke patut dijaga di Sarawak laban pengelikun enggau kaul ke tegap tiang pemujur menua enggau bansa,” ku iya.