RENGKA PIRAK: Sugu tinggi (digitang), sebengkah ari ngepan asal indu Iban.
KEREJA ALUS: Pengalus pengawa digaga ngena marik.
MIRI: Lagu Taun Baru China ngemenuhka pending endang enda salah agi pengagit berami nyau datai baru ba pasar Gong Xi Fa Cai Miri.
Pemayuh macham bansa barang ke dijual baka biskut, limau mandarin enggau achar endang bisi baka selama maya pasar Taun Baru China (TBC) maya musim pengerami diatu.
Tang bisi penyelai mimit taun tu dipeda kedai arau ke bejualka ngepan asal enggau tawak ngenyitka ati mensia setegal utai ke dijual nya datai ari dunya ke bebida.
“Pasar tu awak ke manah ungkup bedagang. Mayuh temuai datai nyengkaum ari menua tasik deka ngasaika peneleba berichah ditu,” ku Mariam Anak Jilan, 35, ke bejualka ngepan asal Iban, asil pengelandik jari enggau perengka tabuh.
Sekeda ari utai jual iya nya selampai, pua kumbu enggau tanggui.
“Tebal agi orang ke bebelika utai ari iya nya bansa Iban enggau Orang Ulu tang bisi mega bansa China enggau temuai ari menua tasik, barang ke dibeli dibai pulai ke pengingat,” terang Jilan lebuh ditanya bekaul enggau orang ke meli barang.
Kelimpah ari ngepan asal, bisi mega tawak dijual ba kedai arau iya.
“Bisi nya berega RM400,” ku iya sambil jari nunjuk ngagai tawak ke bebesai enggau ke udah dikilat.
“Tawak ke besai tu rega iya lebih RM1,200,” ku iya, sambil nunjuk tawak besai sereta berat ke direbah ba atas lantai kedai.
“Nya mar agi laban digaga ari temaga lama lalu kira nyadi nyadi pesaka lama. Tang rega enggi aku ditu nya agi tau ditawar,” ku iya sambil tuchum.
Jilan mai barang ke dijual iya ari rumah panjai.