Peranak Sarawak udah nunjukka bukti ngena leka jaku ‘Allah’ sebedau merdeka kelia
MIRI: Piak ti nadai betanggungpengawa dikearapka ngetu nyaru runding raban orang Keristin di Sarawak bekaul enggau ngena leka jaku ‘Allah’.
Kaban Kunsil Nengeri (ADUN) Telang Usan, Dennis Ngau Jok madah, peranak Sarawak udah nunjukka bukti ngena nya leka jaku ‘Allah’ sebedau merdeka kelia.
“Kitai (Sarawak) ulih ngena leka jaku (Allah) nya, kitai nadai ditagang ngena nya baka ti dipadahka sekeda piak,” ku iya bejaku ngagai Utusan Borneo kemari.
Iya mansutka pekara nya, laban sekeda orang ngeluarka penerang ti enda betul pasal isu nya apin lama.
Sida nya ku iya, semina deka ngambi ulih ba raban orang Keristin ti enda tentu nemu pasal pekara nya.
“Ukai nya deka nerangka pekara ke bendar, tang lebih nyaru runding orang mayuh, nya amat nadai tanggungpengawa,” ku iya.
Penerang ti nyaru runding nya ku Dennis, baka ti nunjukka nadai pengarap enggau enda puas ati.
“Sapa madah kitai (Keristin) diayahka, uji keingatka baru sejarah (Sarawak) lalu peda bukti iya,” ku iya ti mega bisi seiku menyadi lelaki ti kala nyadi Presiden Sidang Injil Borneo (SIB) Sarawak pengelama 15 taun.
Ngenang peneleba diri, iya madahka diri kala besembiang di gerija SIB di Kuala Lumpur sereta nadai pekara ti enda manah nyadi.
“Aku bisi diri sebilik (raban pengarap Keristin) di Semenanjung Malaysia ti ngena gerija SIB din, nadai mega penanggul nyadi,” ku Dennis.
Ensanus, Menteri Kereja Raya Datuk Fadillah Yusof ti mega Kaban Parlimen Petra Jaya madahka isu nya enda nyadi di nengeri tu.
Fadillah mega madahka pekara nya dijamin Kepala Menteri enggau Menteri Muda di Opis Kepala Menteri (Pekara Islam) pasal ngena leka jaku ‘Allah’ lebuh besembiang, belagu enggau kereban chelak raban Keristin di Sarawak.