JOSEPH SALANG
SIBU: Pengajar di sekula menua pesisir dilalau anang kelalu chakah bepolitik taja pan sida nyadi kaban parti politik.
Kaban Parlimen Julau Datuk Joseph Salang Gandum madah, pengajar patut ngemeratka pengawa ngajar nembiak ke batang tanggungpengawa sida.
“Peranak menua pesisir ngasaika pengajar orang ke pemadu dipebasaka. Sida ngasi amat ke semua jaku lalau enggau jaku ajar ari pengajar.
“Enti pengajar kelalu chakah bepolitik, nya dikeirauka tau ngachau batang pengawa enggau pelajar nembiak.
“Kitai patut nemu, semua pengawa ti dikereja kitai semampai diperatika orang ti ngelingi kitai.
“Ambika chunto, peranak rumah panjai tau nyadi pending enggau mata ti beratika semua ulah kitai.
“Enti kitai kelalu chakah bepolitik, ulah nya deka ngamahka profesyen kitai lebih agi enti kitai bepolitik ngarika penyakal,” ku iya.
Iya bejaku munyi tu ba Pengerami Nyuaka Insentif Penyulut Akademik ba Peresa UPSR/PMR 2013 ungkup sekula dalam sitak Parlimen Julau ba Dewan SK St Alphonsus, Julau kena Hari Lima minggu nyin tadi.
Sama bisi ngulu pengerami nya, Pemesai Opis Pelajar Pelilih Mit (PPD) Julau Andrew Kana, DO Julau, Chumang Nyabong enggau Pemancha Janggu Banyang.
Insentif nya datai ari pemeri iya empu ngagai bala nembiak ke nyulut ba peresa UPSR enggau PMR ari 43 buah sekula primari enggau tiga buah sekula sekondari di Julau.
Nembiak ti bulih 5A dalam peresa UPSR merima RM500 lalu ti teulihka 8A dalam peresa PMR nerima RM1,000.
Bisi 16 iku nembiak nerima insentif nya, lapan iku nyulut ba peresa UPSR lalu lapan iku agi nyulut ba peresa PMR.
Pengawa meri insentif nya mega sebengkah ari chara Salang meri peransang ngagai nembiak sekula di Julau.
Salang ke mega Chairman Kaunsil Penyanding Penemu nangkan, pengawa bepolitik ngarika penyakal, udah ngasuh sekeda orang enda lantang ati sereta mai mayuh penanggul.
“Bepolitik meh negah chara ke manah. Pengajar patut lebih agi ngemeratka profesyen sereta nyaup perintah nempa modal mensia ke pandai ngambi ulih ngemansangka menua jemah ila,” ku iya.
Ku Salang, enti nembiak ngembuan pemutus akademik ke manah sida deka ngembuan jalai pengidup ke meruan sereta ulih nyaup ngemansangka menua.
Tandu iya, apai indai diatu arap bendar ati ke pelajar ti diajar ba sekula menua tu empu.
“Aku nemu bisi sekeda nembiak bulih belajar ari sekeda institusyen pelajar tinggi di menua tasik, tang apai indai tetap dekaka anak sida nampung pelajar ba menua tu empu laban sida nemu pemanah tikas setindit pelajar di menua tu.
“Nya alai, bala pengajar patut malas pengarap ati apai indai nya negah chara gawa enggau naka pemanah ngiri pemandai ngagai anak sida.
“Tambah mega, sekula di menua pesisir diberi perengkaguna ke chukup, nya alai nadai kebuah bala pengajar enda ulih ngajar enggau manah,” ku iya.
Apai inda mega patut ngembuan ulah deka besemekih ngemasang sereta nyimpan duit ke anak, ngambika bisi dikena nyengulaka sida ngagai palan pelajar tinggi dudi ila.
Iya mega ngelalau bala penerima insentif ngambika semampai ransing sereta bulih pemutus ke manah ba peresa bukai dudi ila.
“Enti kita majak teulihka pemutus ke manah, perintah enggau kompeni besai nadai penanggul meri kita skolarship kena nampung pelajar ngagai tikas ke tinggi agi,” ku iya.