MINTA SUKUNG: Fatimah mandangka kalenda aktiviti taun 2014 ba aum media begulai enggau Dayang Mariani (kiba).
KUCHING: Olimpik Khas Sarawak pampang Kuching minta mayuh agi bala sukarelawan enggau sektor korporat sama enggau bejalaika pengawa latih sereta ngemujurka program 2014.
Chairman Olimpik Khas Sarawak Datuk Fatimah Abdullah madah, tu laban mayuh aktiviti deka diatur taun tu ungkup atlet ke timpang pendiau (OKU).
“Kami begunaka mayuh agi raban sukarelawan mantu bejalaika mayuh macham aktiviti ke udah diperambu taun tu,” ku iya madah ba aum media lebuh raban Olimpik Khas tu nemuai ngagai opis iya di Bangunan Baitulmakmur ditu, ensanus.
Kelimpah ari nya Fatimah madah, sukung ari apai indai, sektor korporat, pengajar nyengkaum lutur beguna amat dikena ngemujurka program nya.
Fatimah ti mega Menteri Pengelantang Pendiau, Orang Indu enggau Pemansang Ruang Bilik madah mayuh atlet OKU ditu, ngembuan pengelandik dalam lumba enggau main.
Nya alai ku iya, aktiviti nya ila ulih nyadi palan bala atlet nya nyapai pemujur besai agi jemah ila.
Ba atur pengawa nya mega, Presiden Olimpik Khas Sarawak pampang Kuching, Datin Dayang Mariani Abang Zain madah aktiviti besai ke deka diatur ba taun tu iya nya niki Bukit Serapi kena 31 Ogos tu ila.
Iya madah akttivit niki bukit nya ila deka dipasuk raban atlet, jurulatih enggau sukarelawan bepalan ba Taman Keluarga Matang.
Iya nambah, Gerempung Pemansang Ekonomi Sarawak (SEDC) deka melanja aktiviti nya, taja pia sida iya agi begunaka sukung (agi sukut belanja) ari mensia mayuh enggau sektor korporat kena ngemujurka aktiviti nya,” ku iya.
Kelimpah ari nya mega, aktiviti ti dipelaba nyadi pengerindu mensia mayuh nangkan aktiviti niki bukit, iya nya pekit main bol Piala Borneo 2014 ti deka digaga di Kota Tarakan, Kalimantan Utara, Indoonesia, ba bulan November tu ila.
“Kami mega deka ngaga Program Atlet Bepengerai (HAP) 2014 ke deka diatur di SMK Demak Baru, Jalai Diplomatik kena bulan Jun, alai sekeda ari atur program nya ila, deka meresa pengerai sechara pechuma ungkup atlet sereta anak mit OKU,” ku iya.
Ba aktiviti renggat bansa enggau antarabansa, Mariani madah piak sida mega deka sama enggau besemekih nyereta aktiviti niki Gunung Kinabalu Olimpik Khas ke-6 ke deka diatur ba Kota Kinabalu, Sabah ari 27 nyentuk ke 30 March.
Ku iya, piak sida mega udah nyikap diri nyereta Lumba enggau Main Musim Panas 2015 ti deka diatur di Los Angeles, Amerika Syarikat.
“Kami ngarapka atlet kitai sekali agi deka ngangkatka nama menua tu lalu mai pulai midul emas.
“Ba pekit Lumba enggau Main Musim Chelap Olimpik Khas 2013 di Pyeongchang, Korea Selatan, atlet kitai mujur teulihka dua gangsa dalam pekit hoki lantai enggau ‘snowshoeing’,” ku iya.