MARUDI: Kaban Parlimen (MP) Baram Anyi Ngau udah ngulu aum Komiti Malam Budaya Regata Baram pagi ensana ke diatur ba Bilik Aum Opis Pelilih Marudi ditu.
Aum nya diatur berandauka aktiviti ke deka digaga muak ke malam sepemanjai Regata Baram ke disadang deka diatur kena 22 nyentuk ke 24 Ogos 2014 taun tu.
Regata Baram iya nya sebengkah aktiviti lumba perau ke tebilang nama tu dikearapka ulih matak bala temuai luar enggau dalam menua tu.
Ba pengerami sebedau tu, aktiviti legit Malam Budaya Regata Baram ba taun tu iya nya Pekit Pemajik Gamal kelimpah mantaika main asal ari pupu raban bansa di menua Baram enggau Pekit Karaoke ‘Baram Idol’.
Ba aum nya, Anyi dipilih nyadi Chairman Malam Budaya Regata Baram seraya Kaban Kunsil Nengeri (ADUN) Telang Usan Dennis Ngau nyadi Chairman ba Pengerami Ai kelimpah Datuk Sylvester Entri nyadi Chairman Komiti Besai Regata Baram.
Bela bisi datai ba aum nya Kunsil Opis Pelilih Marudi Mackos Sibong, SAO Long Lama Louis Michael Balau enggau bala pengari ari opis ijinsi -ijinsi perintah.