Anda di sini

Perintah dipinta mantaika kebuah meku suwa tanah di pasar Betong

Advertisement

KUCHING: Chairman DAP Sarawak Chong Chieng Jen (gambar) minta perintah nerangka kebuah mekuka pengawa ngemaruka suwa tanah, dalam kandang 3 km ari tengah pasar Betong.

Ku iya, nitihka surat ke diterima ari Opis Tanah enggau Survei Pelilih Menua Betong apin lama ke udah, ngenetpka semua peminta ngemaruka suwa tanah ba kandang endur nya, enda dikemendar naka ke diatu.

Ku iya, pemutus nya ngenusahka peranak menua nya ke nguan kandang endur ke mungkur urung 7,000 ikar tanah nyengkaum rumah kedai enggau rumah panjai.

“Pengawa mekuka semua suwa tanah nya enda patut, sereta polisi tanah ke pengabis nadai guna di menua tu didinga aku sekumbang 15 taun aku malut diri ba politik,” ku iya.

“Kami deka ngemataka pekara tu laban perintah enda patut ngerampas tanah enggau reta orang ti ngempu tanah nya,”pia ku iya madah ngagai pengarang berita ba Indu Opis DAP Sarawak ditu, apin lama ke udah.

Chong ke mega Kaban Parlimen Bandar Kuching sereta Kaban Kunsil Nengeri Kota Sentosa madah, surat ari Opis Tanah enggau Survei (JTS) ke diterima iya nya kena sida nimbal surat ke dianjung aku dulu ari tu ngagai opis, nanyaka kebuah peminta ngemaruka timpuh suwa tanah ba kandang 3 km ari pusat pasar Betong, enda dikemendar taja pan timpuh suwa nya udah abis.

Taja pan opis nya malas madahka pekara nya dipejalai laban perintah nyendiaka diri deka ngaga langkar perambu ungkup pasar nya, Chong ngasaika tanah nya digalau ungkup bala kaban (kroni) perintah menua, tang iya enggai nerangka mayuh agi pasal pekara nya.

Sentang pekara nya ku iya, orang ti ngempu tanah nya mengkang ulih nuntut tanah sida nengah chara nekan ari segi politik sereta berakup.

Penanggul tu tebantai pengudah DAP nerima sebana ari orang ke ngempu tanah nya, lebuh ngatur randau enggau peranak pasar Betong kena bulan Julai taun siti nyin tadi.

Berengkah ari nya, parti DAP udah ngaga sekeda aum enggau pengarang berita ngambi mantaika pekara nya. Ba berita ke dipansut sebedau tu madahka tanah nya ba sitak Kunsil Nengeri Layar.

Advertisement