Anda di sini

Mong Dagang nyangkal tuduh DAP

Advertisement

TERIMA MEH: Mong (lima kiba) nyuaka chek MRP ngagai seiku penerima ba pengerami nya. Bisi ayan Masir (empat kiba) enggau Whelton (tiga kiba).

SRI AMAN: Menteri Muda Batanam Betupi Datuk Mong Dagang nyangkal tuduh Parti Tindakan Demokratik (DAP) ti madahka projek nanam kelapa sawit nengah MPOB deka diketuka.

Tang ku iya projek nanam kelapa sawit ungkup pekebun-pekebun mit di menua pesisir deka majak dipejalaika.

“Tuduh DAP nya nguji ngusutka runding sereta dikena sida bejaika perintah Barisan Nasional (BN) kelimpah dikena naburka jaku petenah ngambika bulih sukung politik ari rayat.

“Tu seiti ari petenah ke deka dibai ketuai DAP dikena ngulihka sukung politik.

“Perintah deka terus belajaika projek nanam kelapa sawit nengah Opis Betanam Betupi,” ku Mong ke mega ADUN Bukit Begunan maya bejaku ba pengerami  nyerahka chek geran Projek Mit Menua Pesisir (MRP) sepenyampau RM45,000 ngagai 10 Komiti Pemansang enggau Pengelikun Genturung Pendiau (JKKK) sereta Biro Indu sitak Kunsil Nengeri (DUN) Bukit Begunan, ditu, kemari.

Semilan JKKK nyengkaum sebuah Biro Indu ke nerima MRP nya baka JKKK Rumah Anyai, Entulang Enttawa sepenyampau RM5,000, JKKK Rumah Dennis Kemintin Klauh (RM3,000), JKKK Rumah Banggau, Kemintin Tengah Klauh (RM5,000), JKKK Rumah Selimin, Jambatan Klauh (RM5,000), JKKK Rumah Medang, Kemintin Klauh (RM3,000), JKKK Rumah Jawan, Panggil (RM6,000), JKKK Rumah Engkamat, Nanga Panggil (RM6,000), JKKK Rumah Tindi, Melugu Tembawai (RM4,000) enggau Biro Indu Rumah Philly Entulang Jambatan (RM4,000).

Pengerami nyuaka Chek MRP DUN Bukit Begunan tu udah diatur ba Rumah Slimin, Klauh Jambatan, Sri Aman.

Bisi datai Kaban Parlimen Sri Aman Masir Kujat, Pemesai Pemadah JASA Parlimen Sri Aman Whelton Lumpoi enggau bala tuai raban bansa ngelingi Sri Aman.

Advertisement