MIRI: Kaban Kunsil Nengeri (ADUN) Telang Usan Dennis Ngau enda lantang ati enggau ulah penyakal ke semina landik bejaku bejaika perintah tang enda nemu ngereja sebarang pengawa mantu peranak ke dituntung penusah.
Ku iya, penyakal semina landik bejaku bekaul enggau isu ke mit, sida (penyakal) nerima sukung lalu rayat bejaika perintah tang maya rayat dituntung penusah, ambika chunto, maya ampuh bah sida nadai ayan.
“Tu meh ulah nyata penyakal, enti rayat dituntung penusah sida nadai temu penunga.
“Aku arapka rayat udah sedar lalu nemu sapa ke bendar sida (penyakal) tu,” ku Dennis madah ngagai The Borneo Post lebuh ditanya bekaul enggau penusah ampuh bah ke nuntung pelilih menua Baram, bedau lama ke udah.
Tandu Dennis, lebuh penusah ampuh bah nyadi, sida penyakal nadai ba tempat penyadi.
Ku iya, rayat bukai baka pengereja pengawa opis perintah ari piak ke bekaul enggau pengari rayat Barisan Nasional (BN) betemu enggau rayat mantu sida ke dituntung penusah ampuh bah.
“Kitai ngarapka rayat nemu manding pemanah ulah sida enggau orang bukai ngelamatu enda ngira maya senang enggau tusah.
“Tang BN enda baka nya, kami (BN) semampai mantu rayat,” ku iya.
Nerang enggau nyemetak, Dennis madah, enti rega minyak niki sida (penyakal) begeguai ngaga aum media bejaika perintah.
“Tang enti penusah bisi nuntung rayat baka ampuh bah, sida nadai besegaut mantu rayat.
“Sida (penyakal) semina landik bejaku manis, tang berat tulang mantu rayat, ku iya.
Berebak enggau nya, Dennis madah, menua Baram ke besai sereta panjai nyauka sebaka pemesai enggau nengeri Pahang, ngelalau rayat bejejaga lebuh betapi enggau musim landas ke benung nuntung nengeri Sarawak.
Tandu iya, sebarang penusah ke bisi nyadi patut diriput terus ngagai tuai genturung pendiau tauka tuai rumah, opis residen tauka iya empu ngambika penanggul ke ditapi ulih diputar enggau lengkas.