SIBU: Kaban Komiti Besai Parti Demokratik Progresif Sarawak (SPDP) Kaunsilor James Laju Ambok ngelalau bala kaban Opis Penguasa Kandang Menua (PBT) kelebih agi ke ngarika parti nya bebendar bejalaika pengawa nyaga pengelantang pendiau raban bansa.
Ku iya, pekara ke amat beguna iya nya sida patut ngenukuka diri ngembuan pengelandik enggau penemu ke chukup maya bejalaika pengawa.
Ku Laju, raban tu patut nemu tanggungpengawa nyadi kaunsilor ngambika enda salah bejalaika pengawa ke rayat sereta rari ari tuju asal.
“Nyadi seiku kaban PBT, sida patut nemu tanggungpengawa kaunsilor ke nyadi jematan antara rayat enggau perintah, ambika chunto, nerangka polisi perintah,” ku iya ba sebengkah pengerami kelai meri terima kasih ketegal nyiri Kaunsilor Brain Langit nyadi kaban PBT, Opis Pelilih Menua Kanowit di Ladang Pedai, Kanowit apin lama ke udah.
Kelimpah ari nya, Laju madah raban nya mega patut nemu enggau dalam bekaul enggau undang-undang PBT dikena ngemujurka pengawa sida ngagai raban bansa.
Ku iya tetiap kaban PBT patut nemu undang-undang ke udah bisi nyengkaum Akta Kerajaan Tempatan 1976, Akta Jalan, Parit dan Bangunan 1974, Akta Perancang Bandar dan Desa 1976 sereta Undang-undang Mit PBT.
“Dikena ngemujurka kitai tejapaika juluk nyadi nengeri maju, kitai patut ngembuan bala kaunsilor ke kreatif, bisi ubah ba chara berunding, landik ngembing raban bansa sereta seruran sensitif enggau ubah dunya.
“Aku pechaya bala kaban PBT ke dipadu ngembuan pengelandik mai PBT ngagai tikas ke nyulut agi,” ku iya.
Laju madah, sida mega patut semampai betemu enggau mensia mayuh meda kediri penanggul perengkaguna ke ditapi sekeda raban bansa.
“Sida (kaban opis kaunsil) beempu tanggungpengawa ngenukuka jalai semampai likun, kedai endur bejual enda udu kamah, pendiau uras, pemeresi agu mensia mayuh dikemerat enggau utai bukai,” ku iya.
Laju ke diangkatka baru nyadi Chairman Opis Kaunsil Pelilih Menua Pesisir Sibu (MDLBS) madah, semua pengawa patut dikereja enggau jampat sereta ngelalau bala kaban opis kaunsil semampai betemu enggau mensia mayuh.
Sama bisi datai Kaunsilor Pasang Ngalambai, Kaunsilor Man Jalaieng sereta bala tuai raban bansa ke bukai ngelingi menua Kanowit.