Anda di sini

Buka runding kena nyapai juluk, ku Wilson Ugak

Advertisement

Kaban sesebengkah gerempung patut ngemeratka kerejasama, penyakah gawa, ngemeranka penemu tebuka

SIBU: Genap kaban Gerempung Bansa Dayak Sarawak (SDNU) patut ngembuan runding ke menuku ngambi tejapaika juluk ti dikedekaka gerempung.

Kaban Parlimen (MP) Ulu Rejang Wilson Ugak Kumbong (gambar) madah, pemujur sesebengkah gerempung bepanggai ba kerejasama sereta penyakah bala kaban gerempung kelimpah ari ngemeranka polisi runding ke tebuka.

Ku iya, sebarang langgur penemu orang luar patut diterima nengah chara ke tebuka ngambi pulaika pemaik gerempung.

“Genap bengkah jaku bantah patut diambi nyadika peransang dikena nampal pengelemi gerempung. Kekadang langgur penemu ke ditibar orang ari luar bisi pengamat, nya alai kitai enda tau enda ngembuan runding ke tebuka,” ku iya.

Iya bejaku munyi tu ba Pengerami Makai Lemai Nembiak SDNU Unit Kemuyang ditu malam ensana jauh.

Sama bisi ngulu pengerami nya, Chairman SDNU Pampang Sibu ke mega Sekretari Politik Kepala Menteri Tengku Geruna, Chairman Opis Kaunsil Pelilih Mit Menua Pesisir Sibu (MDLBS) Kaunsilor James Laju Ambok enggau Panglima 9 Briged Mohd Damien Abdullah.

Ku Ugak nandu, kaban gerempung mega patut nyeliahka diri ari nempa pekara ke enda manah dalam gerempung laban nya semina tau ngujungka gerempung pambar.

Iya mega meransang Chairman gerempung ngayanka ulah ke manah lebuh bejalaika gerempung ngambi tejapaika juluk ti dikedekaka ti deka mai pamaik ngagai semua.

“Anang semina ngemeratka diri empu aja. Genap pemutus patut dipesejuka semua, ukai ari seiku aja. Penanggul ke baka nya suah nyadi dalam gerempung ti ngujungka sesebuah gerempung nya pambar ketegal beserekang penemu.

“Kami deka kita nyeliahka semua nya laban tuju kitai bisi gerempung ketegal deka begempung sereta sepenemu nyapai sebarang pemutus nengah penemu ari semua. Nya alai semua aum ke diatur gerempung nya beguna amat,” ku iya.

Ugak mega arap SDNU semampai nengah jalai ke betul ngambika ulih ngintu pengelantang pendiau bansa Iban lebih agi ti diau ba kandang mengeri.

Berebak enggau pengerami nya, iya ngungkupka belanja RM5,000 ngagai SDNU Unit Kemuyang.

Advertisement