Anda di sini

Penusah perau karam ke suah nyadi patut ke lalau

Advertisement

AUGUSTINE

Pengawa berumban, enda ngemeratka pengelikun diri sereta nepan perau sarat tau ngujungka penyadi ti enda disadang

BINTANGOR: Penusah perau karam ti naban ke nyawa kena Hari Lima tu tadi patut nyadika lalau ngagai semua lebih agi sida ti bekenaka perengka pemindah baka perau.

Penghulu Augustine Pau madah, taja penusah baka tu enda disadang nyadi tang enti ulih seliahka diri nepan perau ti kelalu sarat.

“Kitai bela beajarka pangan diri maya bekenaka perau ngambika penusah baka tu enda nyadi agi.

“Taja baka ni pan pemerumban, pengelikun diri empu patut dikemeratka dulu,” ku iya maya dikerandau pengarang berita, kemari.

Kelimpah ari nya, ku iya, sebedau merau mega tagang diri ari kelalu beirupka ai bisa  nyentuk ke nyau mabuk.

Augustine madah, nyema penusah enda disadang nyadi, sida ke mabuk enda ulih teidupka diri kelimpah ari ti tau ngemediska orang bukai.

“Pekara tu lebih agi patut dikemeratka sida ti deriba injin laban sida nentuka pemujur pejalai perau.

“Tang taja pan baka nya, sida ke bukai mega ditangkan anang enggau orang nepan perau nyema agi mabuk,” ku iya nandu.

Penusah perau karam ti nyadi ba Tebing Pasar Bintangor kena Hari Lima tu tadi mai nyawa Kenny Bisa, 28 taun.

Dulu agi ari nya, iya enggau 17 iku nyengkaum seiku indu ari Rumah Usop, Sungai Sian baru meleka ari Pasar Bintangor deka nyempulang perau bukai nganjung antu ngagai Pendam Nanga Bangkit, Nanga Selidap ditu.

Tang ketegal kelalu sarat perau sida karam diumbaka umbak kapal ke bisi mansa maya nya.

Bangkai niang mujur ditemu pukul 11.57 pagi ensana (Hari Minggu) urung satu kilometer ari palan penusah.

Niang udah dianjung pagi kemari.

Berebak enggau tu mega, Augustine ngarika sida niang Kenny sebilik enggau Opis Kaunsil Meradong meri besai terima kasih ngagai Kaban Parlimen Tanjung Manis Datuk Norah Abdul Rahman enggau Kaban Kunsil Nengeri Semop Abdullah Saidol laban udah nyaup ngiga niang ari ngeluarka belanja.

“Kitai mega meri besai terima kasih ngagai Raban Penyah Penusah enggau Pengerara Api (Bomba), Polis, Rela, JPAM enggau sida serumah laban udah bebendar nyaup pengawa ngiga niang sebedau tu,” ku iya nandu.

Advertisement