MANAH KE PENGERAI: Entulu (tiga kiba) nganyanka tambai ke meransang pengereja pengawa ngemeratka pengerai. Bela dipeda Yahaya (dua kanan).
KUCHING: Opis Perintah Besai di Sarawak sereta Opis Main Asal enggau Seni Menua mujur ngatur Program Senam Sihat 1Malaysia 2014 di laman endur ngengkah entukar opis nya di Simpang Tiga ditu, kemari.
Program dilanchar Menteri ba Opis Menteri Besai Datuk Joseph Entulu Belaun sereta bela digulu enda kurang ari 100 iku pengereja pengawa nyengkaum raban pemesai.
“Program tu meransang mensia mayuh ngemeranka pengidup ke regas ti tau endar nyeliah kitai ari ngidap penyakit.
“Senam ulih mantu kitai ngurangka pemerat tubuh lalu ngangkatka pemanah gawa enggau serbis,’ku iya.
Nungkatka rambai jaku ‘Kekal Sihat Ala Malaysia’ Senam Sihat 1Malaysia ngemasukka tanda main asal tiap pupu bansa di Malaysia ke nyadi alun gaya senam lalu disempulang enggau muzik menua tu empu.
Entulu nambah, penyulut tiap iku pengereja pengawa perintah bepun ari pemanah ulah seseiku orang kelebih agi ba pekara mental enggau fizikal.
Ku iya, siti entara inisiatif ti tau nentuka mental enggau fizikal manggai ba ikas pemadu tinggi iya nya nengah senam.
“Pemujur enda datai sengapa enti nadai pengeran kitai nyendiakka awak besenam. Kitai patut ngungkupka 20 minit ninting hari dikena besenam,”ku iya.
Berindik enggau nya, Entulu meransang opis nya bejalaika Senam Sihat 1Malaysia sekali sebulan lalu enti nerima timbal ke manah tau diadu sekali tauka dua kali seminggu.
Iya mega ngagihka RM30,000 ngagai Opis perintah besai Sarawak ngambika tau dikena ngatur mayuh macham pekit ti bekaul enggau pekara pengerai sereta pengeregas tubuh.
Bela datai Sekretari Perintah Besai (Sarawak) Datuk Md Yahaya Basimin.