KUCHING: Polis menua tu deka nambah mayuh agi unit polis bermutosikal, enggau penambah mutosikal ke deka dibeli kena polis bejalaika pengawa sida kelebih agi lebuh ngelawa genturung pendiau mensia mayuh di menua tu.
Sapit Kepala Polis Dato Law Hong Soon madah, lebuh 88 buah mutosikal nya datai ila, iya deka diberi ngagai polis di sitak ‘angat’ baka di Bintulu, Miri, Sibu enggau Kuching.
Iya madah ‘Unit Rondaan Bermotosikal’ (URB) deka mantu ngurangka pengawa salah baka serungkaimasuk ngagai rumah orang, enchuri ke suah endar nyadi ukai semina malam hari tang maya orang udah nurun gawa.
“Kelimpah ari ngelawa genturung pendiau mensia mayuh ke diau ba sitak ‘hotspot’, pengawa polis URB mega deka bekelala enggau mensia mayuh ke diau ba sesebengkah genturung pendiau, laban nengah chara nya, kaul polis enggau mensia mayuh nyadi tegut agi, lalu sida (polis) mega tau nanya timbal mensia mayuh ke diau di sesebengkah genturung pendiau,” ku Law.
Iya madah baka nya pengudah ngepunka atur pengawa, ngarika Kepala Polis Dato’ Wira Muhammad Sabtu Osman di Operasi Maya Hari Besai ‘Op Selamat IV Taun 2014’ di Kuching Sentral ditu, kemari.
Sebedau nya Law maya aum media madah, kelimpah ari pengelikun jalai alun, mai kelalu mayuh penumpang ari ke patut pan salah dalam undang-undang.
“Kami minta kerejasama mensia mayuh mantu polis. Enti rumah kita ditinggal lama, kunchi rumah, reta tengkira mesti disikap enggau manah. Ngeripot ngagai polis madahka penunga kita, ngambika bisi pemereti dua jalai ulih mantu kita reta tengkira kita likun,” ku iya.
Nya alai, ku Law, polis ngemeratka peneka pinta komuniti, minta sida iya nimbal ni bagi pekara bukai ke ulih dibantu polis dalam pekara pengelikun genturung pendiau.
“Kami udah ngaga naka pemanah, tang pemanah nya ngelantangka ati mensia mayuh tauka enda. Enti bisi kurang, tau madah ngagai kami…Kami deka meda mansik utai ke dipinta kita lalu nguji ngadu pekara nya, tang dalam bungkur undang-undang,” ku iya.
Iya nandu baru, Polis Diraja Malaysia (PDRM) kala ngasuh sebuah konsultan ngaga pansik ke sida iya, ba timbal ari mensia mayuh ba pengawa polis, lalu naka ke diatu ku Law, mensia mayuh berasai lantang ati laban sida iya ngasai bisi pegelikun ke majak manah.
“Nya kebuah kami begunaka polis ngelawa genturung pendiau mensia mayuh tang kadang-kadang komuniti kitai tu ukai bansa orang ke deka meri penemu taja pan chara bekelala bansa tu manah, laban meri penguntung ngagai kededua piak,” ku iya.
Bekaul enggau ‘Op Selamat IV’, operasi nya meri kelala 35 buah endur ke suah endur bebadi jalai alun alai ari penyampau nya, 30 buah jalai Perintah Besai lalu 5 agi, jalai Menua.
“Lalu pia mega enggau jalai ai ke sama dikemeratka. Kena jaket pengelikun maya mudik perau di sungai tauka di tasik. Enti gaya mua hari enda manah, anang pansut laban eti kitai beratika gaya mua hari diatu ke enda berapa,” ku iya lalu nambah operasi Op Selamat IV deka nyengkaum Opis Sarawak Rivers’ Board (SRB), Rela, JPAM enggau Bomba.
Ba pekara ngena ‘sticker’ tauka ‘emblem’ polis ke dilekat ba lumur plet kerita, Law madah pengawa bansa nya salah ba undang-undang Jalai Alun Seksyen 23 ‘Akta Jabatan Pengangkutan Jalan’.
“Enti kami nemu, kami ngeluarka saman. Udah bisi undang-undang pasal pekara tu lalu atur tu semampai dikena kami. Ukai ketegal ngena kelai polis nya, orang nya tau ngereja pengawa salah sengapa…Undang-undang tetap undang-undang!,” ku iya.