KUCHING: Opis Pengelikun Jalai Alun Sarawak (JKJR) ngansak orang bekena jalai alun nitihka tikas pengelaju ti udah ditetap ke alai ulah mai entukar kelalu laju ditemu nyadika kebuah penusah suah nyadi.
Direktor Davina Agnes Enteli madah semina nengah chara nitihka tikas pengelaju sereta beratika tanda jalai, penusah belantak ulih dikurang.
Iya mega ngelalau deriba luri ngambika semampai bejejimat ba jalai alun ketegal perengka pengangkut sida ke besai nya enti dibai laju tau ngujungka jalai rusak.
“Penusah ba jalai alun ulih diseliah, nyerumba pengawa ngintu taun baru ke deka datai tu… mensia mayuh ke driba patut enda ngirup lalu bebaika entukar.
“Kitai deka meda semua pulai enggau likun ke alai semua orang sama bela ngintu pengelikun diri lalu pia mega pengelikun orang bukai,”ku iya bejaku ngagai pemberita pengudah ngelanchar kimpin pengelikun di jalai alun di Terminal Bas Kuching Sentral ditu, malam kilah ensanus.
Ngenang tikas pengelaju ke ditetap ba jalai Pan Borneo, Davina madah sekeda jalai ditetap 100 KM perjam lalu nyadang mensia mayuh deka mai ba tikas pengelaju 90kph.
Iya madah, jalai Pan Borneo enda ulih disemaka enggau jalai besai di Semenanjung Malaysia ke ngembuan 2 lurung.
“Ba jalai Pan Borneo, semina pejalai ari Kuching ke Serian aja digaga dua lurung lalu palan endur mutung semina disedia ba sekeda kandang endur aja. Kategori jalai di Semenanjung Malaysia enggau Sarawak jauh bida.
“Berindik enggau nya, tikas pengelaju ditetap nitihka gaya jalai,’ku iya.
Nengah kimpin nya, dua iku pemesai ari JKJR deka ngemata sereta meri penerang senentang atur pengelikun di jalai alun ngagai mensia mayuh di Terminal Bas Kuching Sentral tiap lemai nyentuk ngagai Taun Baru China.
Nitihka setindit ti ditetap, tiap pejalai bas ti lebih ari 3 jam patut bisi dua iku orang deriba.
Atur tu dikena nentuka bisi seiku agi deriba enti deriba ke dulu udah lelak tauka ngantuk.
JKJR nengeri ngadu kimpin pengelikun jalai alun ba lima bengkah pengerami besai iya nya Taun Baru Cina, Gawai Dayak, Hari Raya Aidilfitri, Deepavali enggau Krismas.
Pukul rata, Terminal Bas Kuching Sentral ngerikod enda kurang ari 1,000 iku orang begunaka servis ninting hari.
Maya musin pengerami, penyampau nya nambah empat kali lipat ke alai urung 4,000 iku orang deka begunaka servis bas di palan nya.