SIBU: Raban bansa Iban patut bechuanka penyelai enggau gaya pengidup raban bansa China, ku Menteri Pemansang Rama Tan Sri William Mawan Ikom.
Ku iya, kelimpah ari ngembuan pengelandik ba pengawa dagang, raban bansa China mega kemerah begulai enggau bansa bukai.
Iya madah, ukai semina bansa Iban tang bansa bukai ba nengeri tu mega patut bechuanka ulah tu dikena ngetanka pengelikun enggau penyerakup.
“Raban bansa China ngembuan pengeransing nempa pengidup diri enda milih alai.
“Seiti ari pengelebih ke nyengala dipeda iya nya sida ulih bejaku ngena jaku bansa orang bukai,” ku iya.
Mawan mantaika jaku nya maya bejadika Pengerami Mantar Taun Baru China ke diatur Komiti Tetangga Pakan, kilah ensana.
Ku iya, nengeri Sarawak diuan pupu raban bansa ti enda sebaka jalai pengidup enggau pengarap.
Kaul enggau pangan diri ku Mawan beguna dikena nempa pengelikun enggau pemansang menua.
Iya madahka, pengelikun bepun ari kaul antara rayat Malaysia seiti pengelebih enggau jalai matak orang luar beranakka puku ba menua tu.
“Ari ulah beserakup kitai ulih nempa menua ke likun lalu rayat semampai ngemeratka penyerakup, pengelikun, nadai charut politik enggau ekonomi ti meruan.
“Konsep 1Malaysia ‘Rayat Dikenulu, Pemansang Dikemerat’ nerangka kaul ti likun enggau kerejasama pupu raban bansa nyadika kunchi tauka senyata napi penguji ngembing menua tu mujur nyapai juluk ati,” ku iya madahka baru.
Nambahka nya, ku Mawan, ngembuan peragam ke enda manah sereta ulah enda puas ati antara pupu raban bansa ba sesebuah menua ukai pekara ti baru.
“Tang nama ke patut iya nya baka ni ulih mutarka pekara tu nengah chara ti engkeman ngambika kitai ulih mantaika pekara ti enda ngemantupka ati tang enda ngeruga pengelikun menua,” ku iya madah.