SAUP NGEMUJURKA ‘WE CARE FEST 2014’: Mathew (empat kiba) enggau raban serakup bukai mandangka tambai atur pengawa serakup nya ti deka diatur kena 2014 di Serakup Gerija Sarawak (ACS) di Jalai Stampin ditu.
KUCHING: ‘Breakthrough Network Centre Bhd’ deka ngatur pengawa ngumpul belanja kedua kali iya,’We Care Fest 2014’ ti kena 3 Mei 2014 di Serakup Gerija Sarawak (ACS) di Jalai Stampin ditu.
Pastor serakup nya, Pastor Mathew Igoh madah, pan ke diulih ari pengawa bejual tu ila deka diberi ngagai program digaga serakup nya ke deka dikena mantu sida ke tasah.
Ba atur pengawa nya ila, entara barang ke bisi dijual, iya nya pemakai ari menua tu empu, macham kedai servis, pemerindang enggau palan bemain, pengawa pemandang, enggau penerang profesyenal ke bisi bekaau enggau atur undang-undang, pengerai, wang, pelajar enggau mayuh macham pekara bukai.
Atur pengawa nya ila mega deka mantaika kunsit mantaika band ari menua tu empu ke deka merindang mensia mayuh.
“Pengatur pengawa tu ila melaba urung 100 buah kedai mit deka bejual lalu tagit kami ulih ngumpul RM200,000. Semua penguntung ke diulih kami deka diberi ngagai program tauka servis enggau projek pengelantang pendiau ke diatur ‘Breakthrough Network’,” ku Mathew.
‘We Care Fest 2014’ diatur ‘Breakthrough Network Centre Berhad’, iya nya sebuah serakup ukai dikuasa ulih Perintah (NGO) ke ditumbuhka lima taun tu ke udah sereta betuju nganjung orang profesyenal enggau orang dagang mantu sida ke tasah ke diau di nengeri tu enggau sekeda sitak menua bukai.
“Diatu kami beratika 4 pekara dalam servis, iya nya Penyiru sereta Ngelawa Ruang Bilik ke begunaka bantu, mantu ngaga rumah, ngajar sida betanam betupi nengah chara asal sereta bejalaika HUB, iya nya sebuah palan nembiak di MJC,” ku iya.
Breakthrough Network Centre ngelalau mensia mayuh sama mantu program tu, ke ulih dipelanja tauka muka kedai ba atur pengawa nya ila, tauka merindang bala mayuh, lalu kelebih agi mantu serakup enggau chara meli kupon kena bebelika barang.
Kupon mega tau dibeli maya hari nya empu ba pintu penama di ACS.
Mensia mayuh ke deka mantu pengawa tu ke deka meri wang tauka pemakai ke deka dijual tau betelefon ngagai serakup tu nengah lumur 014-897 3201 tauka emel ngagai [email protected]