Anda di sini

SDNU Kota Samarahan merambu matak mayuh kaban

Advertisement

GENAP SETAUN PENUMBUH: Jimbun (lima kiba) begulai enggau raban komiti SDNU pampang Kota Samarahan nyirap kek penumbuh gerempung nya genap setaun. Bela dipeda Anthony Banyan (tiga kiba), Belayong (empat kiba) enggau Gluma (tujuh kiba) sereta kaban bukai.

Kelimpah ari nya, pampang bukai mega diperansang ngemayuhka kaban awakka tampak pengering

KUCHING: Gerempung Bansa Dayak Sarawak (SDNU) pampang Kota Samarahan nagit ngerijister mayuh kaban ngambika gerempung dipeda kering lalu diberi pengari ba opis perintah.

Chairman gerempung nya Stanley Belayong Pok madah, pampang engka diberi sekeda pangku pengawa ba opis kaunsil kandang menua enti penyampau kaban dalam gerempung nya mayuh.

“Kelimpah ari nya, pampang SDNU ke bukai mega patut matak mayuh agi orang nyadi kaban gerempung sida ngambika bela bisi pengari ba opis kaunsil ke alai perintah nyendiaka penuduk ke patut diisi kaban ari gerempung tauka NGO,” ku iya.

Stanley mansutka penemu tu ba jaku pengelalu pengerami ngintu Setaun Penumbuh SDNU pampang Kota Samarahan ke diatur ba sebengkah restoran di Siburan, malam ensanus.

Iya mega madah, orang ke nyadi kaban SDNU Kota Samarahan deka ngasaika mayuh macham penguntung ke alai pampang bisi nyendiakka insentif pelajar ngagai anak kaban gerempung ke nyulut ba peresa UPSR, PMR, SPM enggau STPM lalu pia mega enti mujur nampung pelajar ngagai palan pelajar tinggi.

“Kaban ke bisi dituntung penusah baka ke dipasuk ba spital enggau penusah pemati raban ruang bilik mega deka diberi bantu.

“Ketegal nya, SDNU pampang Kota Samarahan deka ngatur mayuh agi program ngumpul belanja udah tu ila,”ku Stanley.

Iya nambah, ari mayar RM10 ngerejister nyadi kaban, tiap iku kaban sah deka teulihka penguntung lalu nya mega nyengkaum bala anak sida nengah insentif pelajar ti disediaka.

Taja pia, penyampau insentif sereta bantu bepanggai ba tikas pemisi belanja gerempung lalu ketegal nya meh kitai deka ngatur mayuh agi program ngumpul belanja, tandu iya.

Ba kaul ke sama, Temenggung James Jimbun Pungga ke nyadi temuai ti dipebasa bela ngansak tiap pampang SDNU matak mayuh agi orang nyadi kaban gerempung.

Ku iya, gerempung enda deka nyadi enti enda ngembuan kaban ke mayuh lalu tiap iku sida patut semampai regas ngereja pengawa.

“Pesan aku ngagai tiap pampang SDNU… semua kaban patut semampai regas ngereja pengawa ungkup pemaik pampang.

“Pampang ke sakit, giga ke lutur, adu ka rumah… Iya ke empai, gaga ke baru,” ku iya.

Jimbun sekali agi ngansak raban bansa Dayak (Iban) muai ulah ti suah deka begedika pangan diri ti udah mansang ba pengidup.

Lekaka penemu tauka runding begedika pemansang pengidup kaban bukai.

Kitai patut belajar ari peneleba ti udah ngangkatka pengidup sida, tandu iya.

Jimbun ke ngarika Sapit Presiden SDNU Datuk Alexander Nanta Linggi bisi nyuaka geran (chek) penyampau RM5,000 ngagai SDNU pampang Kota Samarahan ke diterima Belayong.

Bela bisi ngulu atur pengawa nya, mandal presiden SDNU Anthony Banyan sereta chairman Serakup Dayak Iban Sarawak (Sadia) pampang Kuching Datuk Anthony Nait Mani, ketuai Serakup Indu Dayak Sarawak (SIDS) Kota Samarahan Emas Gijak enggau sapit Walikota Kapit Cr Tapah Ata.

Advertisement