PEMANSANG MENUA PESISIR: Masing nekan suis kena ngidupka karan kelai bejadika sekim bekal lekterik menua pesisir di Rh Seli Nyambong, Ng Lioh, Julau ensana. Bela bisi ayan (ari kanan) Mauh enggau Salang.
PAKAN: Penyukung Barisan Nasional (BN) di Meluan patut udah berengkah ngelala chalun ke patut bediri ba sitak nya ngarika BN ba Pengawa Bepilih Kunsil Nengeri (PRN) ti diadang deka diatur dalam taun 2016, ku presiden Parti Rakyat Sarawak (PRS), Tan Sri Datuk Amar Dr James Masing.
Ku iya, pekara nya beguna amat ngambika chalun ke patut nya dikelala lalu nama iya dianjung ngagai ketuai BN, sereta ngembuan peluang ke manah ngambi sitak nya ari penyakal.
Diatu sitak nya dipegai Wong Judat, mandal presiden Sarawak Peoples’ Party (SWP).
“Baka ke diatu, Kaban Parlimen kitai ba sitak Julau, Datuk Joseph Salang semina bepanggai ba Kaban Kunsil Nengeri BN Pakan (Tan Sri William Mawan) sereta enda ngarapka Kaban Kunsil Nengeri Meluan, laban iya penyakal.
Tu tau disempama baka bot laju ke alai sebagi ari plak injin nya enda ulih dikena agi.
“Enti bot laju nya semina bepanggai ba seiti plak injin aja, nya enda ulih ngelaban peneras ai ba ulu sungai baka ke ba kandang menua tu.
“Enti kededua plak injin nya manah, nya baru bot laju nadai penanggul ngelaban peneras ai nya.
“Reti nya, kitai begunaka kededua iku pengari ari BN ngambika rayat teulihka mayuh pemansang ari perintah,” ku Masing lebuh bejadika rumah panjai baru, Rh Seli Nyambong, Ng Lioh kena Hari Enam nyin tadi.
Ku Masing, mar perintah deka mantu rayat ba sitak nya enti sida mengkang dipegai penyakai dudi ila.
“Taja pia, terima kasih laban kita udah nyukung sereta milih Datuk Salang nya Kaban Parlimen sitak Julau ba Pengawa Bepilih Besai tu tadi ,” ku Masing.
Ku iya, kuasa milih pengari nya bepanggai ba sukung rayat.
“Kami arapka, sapa aja ke dipilih kita, ulih mantu ngemansangka kandang menua tu,” ku iya.
Lebuh ke ngenang sentang pekara nya, Salang arapka Parti Demokratik Progresif Sarawak (SPDP) ti udah diungkupka sitak Meluan, milih chalun ke pemadu engkeman bediri ba sitak nya maya Pengawa Bepilih Kunsil Nengeri dudi tu ila, ngambika seduai ulih begempung ngemansangka rayat engagu kandang menua nya.
“Kami arapka SPDP milih orang ti ulih gawa ke rayat. Ba menua pesisir tu, pengari rayat ke dipilih nya patut nadai penanggul gawa begempung.
“Aku udah ngasaika gawa ngatika diri ngagai rayat ditu ngelama tu,” pia ku Salang.
Baka ke ditemu semua, Salang enggau Wong endang beserekang penemu sebedau Wong ningkilka diri ari SPDP,ti ngujungka iya masuk SWP.
Berebak enggau nya, Masing ke mega Menteri Pemansang Tanah ngelalau rayat ngemansangka tanah Adat Bansa Asal (NCR) sida nengah konsep diatu, ke alai orang ti ngempu tanah deka diberi untung 30 peratus ari asil penguntung ba tanah nya, 60 peratus pulai ngagai kompeni ti ngemansangka tanah nya, lalu 10 peratus ungkup RISDA.
“Sebengkah agi konsep iya nya muka mini estet, ke alai 90 peratus ekuiti nya pulai ngagai orang ti ngempu tanah lalu laluh nya pulaika Felcra, sebuah ejensi ari perintah besai. Sentang kededua pekara tu, kita patut numbuhka komiti lalu ngaga pemutus, kati chara kita deka ngemansangka tanah kita ,” lalau Masing.
Iya mega madahka, mayuh bengkah duit pinjau ari perintah ke tau dipinta rayat di menua pesisir ngambika bisi dikena sida berumah.
“ Kita patut numbuhka komiti dulu ngambika mudah kita minta Opis Tanah enggau Survei ngeluarka surat tanah dikena kita minta duit pinjau kena berumah,” ku iya.
Beserimbai engagu pengerami nya, Masing ngungkupka belanja Projek Mit Pemansang Menua Pesisir (MRP) RM10,000 ngagai rumah panjai 20 pintu nya, ke digaga sida nya serumah nengah chara beripai.
Sama bisi ngulu pengerami nya, Kaban Kunsil Nengeri Tamin, Datuk Joseph Mauh Ikeh, Kaban Kunsil Nengeri Ngemah, Alexander Vincent, Residen Sarikei, Michael Dawie Ali, bala ketuai opis perintah enggau ketuai raban bansa.