SIBU: Chairman Parti Tindakan Demokratik (DAP) Sarawak, Chong Chieng Jen (gambar) madah, Kepala Menteri Pehin Sri Abdul Taib Mahmud ukai chalun ke patut mangku pengawa Tuai Pemegai Menua (TYT) nangkanka tu ila.
Ku Chong, beduduk ari timpuh TYT ke diatu deka abis enda lama agi, tebantai isu sapa bagi chalun ke patut nganti penuduk nya.
Ku iya, mensia mayuh udah melaba madahka Kepala Menteri deka dipadu mangku pengawa nyadi TYT udah tu ila.
“Ba penemu kitai, sida ke dipadu nyadi TYT patut nadai kena balut kes pansik bekaul enggau penyalah berat sereta makai suap,” ku iya bejaku ba aum media, kemari.
Berebak enggau nya, Chong mega madah atur mansik baru peremit import (AP) dikena meli kerita import siti agi semaya puang perintah Barisan Nasional (BN).
Ku iya, perintah besemaya deka mansik baru AP sebedau pengawa bepilih besai tu tadi, tang nyentuk ke diatu bedau bisi pemutus udah digaga.
“Bisi didinga pending, rega kerita dipelabaka nurun ba taun 2018, iya nya maya timpuh pengawa bepilih besai ke-14 deka diatur,” ku tandu iya.