Anda di sini

SDBA chakah ngemansangka tikas main Snuker, ku Yeo

Advertisement

SIBU: Gerempung Billiard enggau Snuker Sitak Sibu (SDBA) benung chakah deka ngemansangka tikas main kenyau ari ke majak nurun sekumbang tu.

Sapit Presiden SDBA Mark Yeo madah, sida benung ngatur pekit besai dikena matak pengerindu penyereta ti tau ngangkatka tikas main nya.

“Tu ukai pekara muntang lebih agi gerempung kitai diatu benung napi penanggul ba belanja.

“Taja pan baka nya, kami deka minta saup ari bala sepunsa ngambika pekit tu ulih diatur enggau mujur seraya kitai ngangkatka tikas main,” pia ku iya madah ngagai pengarang berita.

Yeo mega ngandalka sukung ari peminat snuker mutarka penanggul sida.

Ku iya, main tu tau majak labuh enti sema nadai sukung ari bala peminat snuker empu.

Kelimpah ari nya, iya madahka SDBSA diatu bisi perambu deka ngatur Pekit Snuker Tebuka Sibu ba taun tu.

“Tang kita bedau netapka hari bulan enggau palan alai pekit tu diatur,” ku iya nambahka baru.

Iya madah, bala pemekit kemaya hari tu lebih agi ngemeratka perais mata duit.

Nya alai, gerempung sida chakah deka ngiga orang sepunsa ngemujurka pekit nya kelimpah bebendar deka ngangkatka tikas main snuker.

Nerang enggau nyemetak, Yeo madahka snuker sebengkah main ke badas laban ulih nempa runding ke regas enggau ulah bala pemain.

Ba pekara bukai, iya madahka gerempung sida mega benung ngiga pemain ngarika sitak tu bepekit ba Kejohanan Jemputan Terbuka Selangor ke diatur di Kuala Lumpur bulan Jun ti deka datai.

Advertisement