INTU MANAH: Selamat (kiba) nyuaka replika kunchi ambulan baru ngagai pengari pelilih mit menua Sri Aman, seraya minta nyaga manah reta tengkira perintah nya.
KUCHING: Sarawak lebih dikemerat sereta nengeri keterubah enggau pemadu mayuh nerima ambulan baru, diberi tujuh (7) ari 45 unit ambulan baru ke diungkup ngagai semua Jabatan Pertahanan Awam Malaysia (JPAM) serata Malaysia.
Pekara nya dipadahka Timbalan Pengarah Operasi, JPAM, TPj (PA) Selamat Dahalan lebuh bejadika pengawa gempuru ninting bulan JPAM Nengeri Sarawak ti keterubah (Bilangan 1/2014) taun tu.
Tujuh unit ambulan baru nya diterima JPAM Nengeri Sarawak ari IPPA (Ibu Pejabat Pertahanan Awam) kena 13 Disember 2013.
“Sarawak nengeri keterubah nerima ambulan baru sereta pemadu mayuh nerima iya nya tujuh ari 45 unit ti diberi taun nyin kemari sereta deka diberi ngagai opis pelilih mit menua Petra Jaya, Kuching, Samarahan, Sri Aman, Betong, Mukah enggau Limbang.
“Kitai ngarapka semua tauka lebih agi raban ti diberi tanggungpengawa bejalaika sereta nyaga ambulan tu ulih nyaga enggau manah, laban tu reta tengkira perintah kelimpah ari ti ngambika bisi dikena mantu rayat nengeri tu ke kena tasah,” ku iya seraya ngarapka laluh ari 45 unit ke diungkup dalam taun 2014 ulih diberi ngagai Sarawak.
Nambahka nya, lebuh bejaku ba pengerami nya iya madahka juluk JPAM taun 2014, deka beratka kualiti dalam semua pekara.
Iya ngarapka semua raban JPAM sekalika tetap tauka sukarela sama chakah nyapai juluk 2014 kelimpah ari majak ngemeranka juluk 2013, ti ngambi mayuh agi orang masuk nyadi raban JPAM.
“Taun tu kitai lebih beratka pekara kualiti dalam atur penagwa raban.
“Enti sebedau tu kitai nagit deka ngambi urung 200,000 iku orang nyadi raban (JPAM), taun tu mega kitai agi nagit ke sama (200,000 iku setaun serata Malaysia) tang kitai lebih ngemeratka kualiti.
“Ari 200,000 iku ke diambi nya kitai deka ngenukuka 10 persin tembu latihan asas, lalu ari 10 persin nya kitai deka nentuka 30 persin mesti tembu dua latihan lanjut ngambika sida nya ulih nyadi raban (JPAM) ti bepengelandik bejalaika pengawa Pertahanan Awam sereta sekeda ari penyampau nya deka ditukuka ulih nyadi jurulatih,” ku iya ba pengarami nya ti diatur ba Pusat Penerangan Islam, ditu kemari.
Sarawak ba pengawa ngambi raban JPAM baru taun 2013 nengah Perancangan Strategik (SP) teambika 9,061 iku ari 8,400 iku ti ditagit.
Kelimpah ari nya, Direktor Pertahanan Awam Nengeri Sarawak, Kol. (PA) Mat Zin Bujang dalam jaku pengelalu madahka, nyerumba pengerami ninting bulan JPAM nya bisi lapan iku pegawai sukarela ditikika pangkat taun 2014.
“Pengudah tujuh taun udah pengawa nikika pangkat diberi ngagai pegawai sukarela, tang taun 2014 kitai beterima kasih laban bisi lapan iku pegawai sukarela ditikika pangkat ti nyengkaum ari PDPA Kuching, Sibu, Sarikei, Bintulu, Miri enggau Sri Aman.
“Taun 2014 mega kitai deka ngerembaika Malaysia Emergency Response Services 999 (MER999) ngagai Samarahan, Betong, Limbang enggau Mukah, kelimpah ari ti udah dikerembaika di Petra Jaya, Kuching, Sri Aman, Sibu, Bintulu enggau Miri ba taun 2013,” ku iya.
Ngenang pengawa nyelamatka orang ti kena tasah bah nengah Ops Banjir 2013 – 2014, Mat Zin madahka JPAM nengeri Sarawak udah nguna 32 kereban pengangkut ti nyengkaum bot, ambulan, lori enggau ke bukai sereta bisi 90 iku raban JPAM bejalaika pengawa.
Iya mega madahka JPAM mega bisi mantu ngiga orang ti kena penusah perau karam ti nyadi di Daro, nengah Ops Lemas Kampung Sa’ai -Kampung Kut, Daro.