BERAMI ENGGAU KAMI: Alan (tengah) begulai enggau sida ke bukai ba aum media sentang atur pengerami Taun Baru China di Miri bedau lama ke udah.
MIRI: Parti Tindakan Demokratik (DAP) Miri deka ngatur pengawa Ngelaluka Pengabang kena 9 Februari tu ila beserimbai enggau pengerami ngintu Taun Baru China (TBC) di Restoran Cahaya Taufik, ditu berengkah ari pukul 10.00 pagi nyentuk ke pukul 1.00 ngalih hari.
Nundaku ADUN Piasau, Alan Ling, sida bisi ngundang semua peranak Miri datai bebala mayuh awakka sama-sama ngerichahka program nya.
“Kitai (DAP) deka sama begempung ngatur program Ngelaluka Pengabang beserimbai enggau TBC taun tu,” ku iya ditu kilah ensana jauh.
Sekeda program bukai ke bisi diperambu iya nya mandangka tanda singa enggau besadungka ang pau ngagai bala nembiak.
“Kelimpah ari nya, ba program bukai, kitai nyerahka ngagai Parti Islam Se-Malaysia (PAS) Miri,” terang iya.
Tu setegal pengerami tu diatur begulai enggau PAS Miri lalu sekeda program bisi disediaka piak nya mega.
Temuai dipebasa ke deka bejadika program nya ila Chairman DAP Sarawak, Chong Chieng Jen ke mega Kaban Parlimen Bandar Kuching.
Berebak enggau nya, bisi empat raban tanda singa deka dipandang ngarika DAP Miri maya hari keterubah nyentuk ke-15 TBC.
“Kitai deka nguna duit ke digumpul nya ungkup aktiviti enggau program diatur DAP,” ku Alan.
Ku iya, tuju program nya dikena ngelakuka main asal China seraya negutka penyerakup bansa.