NYAUP NGELEMPUNGKA TATING PENYERANTA: Pungga (empat ari kanan) nyuaka bantu barang pemakai ngagai Siba Payan.
Pungga besebanaka piak ke bekaul nadai meri bantu ngagai ruang bilik ke kurang benasit taja pan bisi nganjung peminta
KUCHING: Enti nitih mayuh ruang bilik ke kurang benasit manah ba menua tu kelebih agi di Tudan begunaka bantu ari mensia mayuh tauka opis ke bekaul.
Ku kaban Komiti Parti Rayat Sarawak (PRS) Pampang Tudan Perdana Pungga Janin madah, ketegal nadai mayuh belanja tauka nadai nerima agih, sida semina ulih ngenataika bantu bengat mit ngagai ruang bilik nya.
“Ba kes tu, kami semina ulih mantu Siba Payan ke ngidap penyakit mati tubuh sepiak sereta diau ba rumah buruk,” ku Pungga ba penerang media pengudah penemuai iya enggau sekeda kaban PRS Pampang Senadin ngagai rumah ruang bilik Siba Payan, kemari.
Raban tu mega bisi nyuaka barang pemakai baka beras enggau utai bukai ngagai ruang bilik Siba Payan.
Tandu iya, agi mayuh raban ke kurang benasit tu enda nemu bisi bantu ke disediaka perintah, ambika chunto baka bantu e-kasih tauka bantu bukai ari Opis Pengintu Pengelantang Raban Bansa (JKM).
“Pia mega, taja pan sida bisi nemu tang nadai nerima saut ke manah ari opis ke bekaul.
“Ambika chunto ba sekeda kes, pengudah kami nemu pemerinsa ke ditapi sida kami lalu mantu ngisi peminta bantu ari opis ke bekaul tang nyentuk ke diatu lalu nadai nerima timbal,” ku Pungga.
Bisi datai Sekretari PRS Pampang Senadin Egi King enggau sekeda kaban parti ari Pampang Tudan Perdana.