NYULUT: Roslan nyuaka replika chek ngagai Balai Polis Satok ti ngarika IPD Kuching ti teulihka lumur satu Balai League Table, Kategori B Taun 2013, ti diatur di serata Malaysia.
Kena nyeliah ari ditemu mensia mayuh, ngurang penyampau penyalah ngelanggar undang-undang nyerumba TBC tu
KUCHING: Anang madahka pemindah tauka pemulai diri ke menua, nyengkaum maya pulai kemisi Taun Baru China (TBC) tu nengah media sosial baka Fecebook, Twitter enggau ke bukai.
Kepala Polis Pelilih Mit Menua Kuching, ACP Roslan Bek madah, nya dikena nyeliah ari ditemu sereta ngurangka penyampau tikas penyalah ngelanggar undang-undang baka kes serungkaichuri.
“Nyerumba kemisi pengerami Taun Baru China ke deka datai tu, aku ngelalau semua raban bansa kelebih agi di mengeri Kuching ngenukuka dulu pengelikun rumah sebedau ninggalka rumah baka ngunchi pintu sereta madah ngagai orang ti berimbai pendiau ke ulih dikearapka.
“Anang sesekali madah dalam Facebook, Wechat, Twitter enggau ke bukai, kitai deka mindah tauka ninggalka rumah, anang madahka dini endur dini, laban tu ulih meri peluang ngagai raban orang ti ngemeranka pengawa jai,” ku iya lebuh dikerandau pengarang berita.
Dulu ari nya Roslan ngulu sereta ngemataka pengawa bebaris ninting bulan Indu Opis Polis Pelilih Mit Menua Kuching (IPD Kuching) ti diatur ba padang kawad IPD Kuching ditu, kemari.
Lebuh ditanya sekalika piak polis bisi ngatur operasi nyerumba Taun Baru China 2014, iya madah, piak polis ninting minggu bisi bejalaika operasi ‘Ops Cantas’ kelimpah tiap kali musim pengerami.
“Kebuah kami bejalaika operasi tu ukai deka ngeruga pengerami, tang deka ngenukuka pengerami diintu enggau likun, lantang sereta richah, nya alai anang salah anggap.
“Maya operasi Taun Baru China tu kami mekuh ngagai penyalah nyerungkai rumah, enchuri mutosikal enggau kebukai baka bejudi, betunuka bungai api enggau merchun ti enda dikemendar.
“Ngagai sida ti deka nunu bungai api ti kelalau mayuh, patut minta peremit dulu,” ku Roslan.
Kelimpah ari nya, iya madahka 2013 taun ti nyulut ba IPD Kuching beduduk ari ti mujur ngurangka tikas penyampau penyalah ngelanggar undang-undang.
Taun 2014, kami deka terus chakah nurun sereta nyeliahka orang ngereja penyalah ngelanggar undang-undang di pelilih mit menua Kuching ngambika raban bansa ulih ngasaika pengidup ti likun sereta lantang, ku iya.
“Kami ukai semina deka ngurangka tikas penyalah ngelanggar undang-undang, tang kami deka anggap rayat tauka raban bansa sida ulih diau dalam pengelikun.
“Naka 21 hari keterubah dalam taun 2014 nunjukka gaya ti positif, nya alai kitai udah ulih nurunka tikas penyampau penyalah ngelanggar undang-undang 36 persin, tu nunjukka pemun ti pemanah taun tu.
“Laban naka 21 hari udah dalam taun tu kami IPD Kuching nadai udah nerima riput bekaul enggau kes runtun enggau kebukai, lalu kami minta orang mayuh meri kerejasama ngagai polis ngaga riput nyemaka bisi nyadi,” ku iya seraya madahka IPD Kuching udah tiga taun bejurut ngurangka tikas penyampau penyalah ngelanggar undang-undang.
Ba pengerami bebaris nya Roslan bisi nyuaka perais sereta setipikit ngagai raban polis ti nyulut bejalaika tanggungpengawa sereta ngagai raban bansa ti mantu polis.