PENERANG: Baru mandangka bup ke ngundan penerang pasal tanah NCR.
Penumbuh nya ulih nyaup mutarka kes tanah ke udah lama betangguh dipecharaka enggau jampat
KUCHING: Udah datai ba maya Sabah enggau Sarawak numbuhka Kot Tanah Adat dikena mutarka kes ti udah lama betangguh, ku Kaban Kunsil Nengeri (ADUN) Ba’Kelalan, Baru Bian.
Nyema kot nya ditumbuh, nya deka meri awak ngagai kes ti udah lama betangguh dipechara enggau jampat agi.
“Ketuai Akim Kot Tinggi Sabah Sarawak, Tan Sri Datuk Seri Penglima Datuk Richard Malanjum ti mantaika perambu nya nunjukka iya nemu pemayuh kes bekaul enggau tanah Hak Adat Bumiputera (NCR) ti betangguh.
“Amat senutuk endar pekara tu dibantai sereta ditumbuhka,” ku iya ba aum pengarang berita ditu kemari.
Iya mansutka pekara nya lebuh ngenang penerang Richard ba ‘Majlis Pelancaran Tahun’ Undang-undang Sabah enggau Sarawak ti diketuaika Ketuai Akim Negara Tun Arifin Zakaria apin lama ke udah.
Nitih penemu Richard ti diambi bejaku madah, perambu numbuhka kot nya beduduk ari penyampau pekara bekaul enggau NCR ti dirikod di kededua nengeri nambah beberapa taun ke udah.
Baru ti nyadi luyar tanah NCR madah, piak sida ngerikodka urung 300 kes ti mengkang betangguh.
Nya alai iya ngarapka perintah nengeri ulih meri timbal ti manah ngagai perambu nya ngambika nyadi nyata.
Kelimpah ari nya, iya mega merambu ngambika akim ti udah pinchin enggau luyar kanan nyadi kaban kot nya.
“Aku kala mantaika pekara bekaul enggau penumbuh Tribunal Tanah maya Aum Kunsil Nengeri tang lalu enda diterima.
“Nya alai, aku temegah ati lebuh (Richard) bekunsi penemu ti sama senentang perambu numbuhka kot tu,” ku iya ti mega Chairman Parti Keadilan Rakyat (PKR) Sarawak.