Anda di sini

Tabung Bank Darah Hospital Miri begunaka mayuh raban volenter

MIRI: Tabung Bank Darah Hospital Miri begunaka mayuh agi raban volenter meri darah dikena ngenyukupka pengurang setuk darah.

Nundaku Pemesai ari Tabung Darah Miri, Dr Manju Inder madah taja pan semua setuk darah bansa A, B, AB enggau 0 majak kusut tang nya enda bangat ngirauka ati.

“Kitai minta orang mayuh datai nyukung kimpin meri darah ngambika setuk darah semampai chukup maya musim pengerami,” ku iya lebuh ke dikerandau kemari.

“Kitai beterima kasih ngagai orang mayuh sebedau tu ke datai mantu kami nengah meri darah lalu kitai ngarapka penyampau orang ke meri darah mega nambah ,” ku iya.

Piak sida bisi ngatur sekeda palan alai meri darah dikena ngenukuka setuk darah seruran chukup.

Sekeda ari kimpin meri darah ke deka diatur pagila nya (Hari Tiga) di Institut Kemahiran Belia Negara Miri (IKBN) tang tu ungkup nembiak dia empu berengkah ari pukul 9 pagi nyentuk ke 1 ngalih hari.

Palan kedua nya di Klinik Kesihatan Beluru kena 25 Januari seraya hari siti nya (Hari Empat) di Masjid Ar Rayyan belabuh ari pukul 9 pagi nyentuk ke 12 tengah hari ungkup kedua-dua palan nya.

Orang mayuh ke deka meri darah tau datai ngagai palan nya tauka datai ati diri ngagai pusat Tabung Bank Darah Miri.

Palan nya dibuka belabuh ari Hari Satu nyentuk ke Hari Lima pukul 8.30 pagi nyentuk ke 4 lemai. Sebarang penerang ke silik agi tau diambi ari Lily nengah lumur 085-416657.