Anda di sini

Sarawak nyadi tempat ke dipilih temuai menua luar

‘COFFEE TABLE BOOK’: Najib (dua kanan) meda bup ‘Coffee Table Book’ ASEAN ke sama disempulang Taib (dua kiba), Abang Johari (kanan) enggau Menteri Dagang Temuai enggau Main Asal Malaysia Datuk Seri Muhd. Nazri Abd. Aziz (kiba).

KUCHING: Sarawak diatu ulih netapka penuduk iya nyadi tempat ke dipilih temuai ari menua luar, taja pan dalam berapa taun tu ke udah, pemayuh temuai ke nemuai kitu semina ngerikut urung 600,000 temuai aja enti dibanding enggau kediatu, udah manggai 3.9 juta temuai.

Kepala Menteri Pehin Sri Abdul Taib Mahmud madah, taja pan Sarawak laun ngenudukka diri nyadi sebuah menua ngangkatka pengawa dagang temuai, tang diatu Sarawak entara menua ke dipilih sereta ditapat temuai.

“Sarawak diatu udah nyadi sebuah menua ke ulih belumba ba atur pemansang pengawa dagang temuai.

“Enti suba Sarawak semina nerima urung 600,000 temuai tang diatu udah manggai 3.9 juta….Tu pekara ke manah” ku Taib lebuh bejaku ba ASEAN Tourism Forum (ATF) Ke-33 di Dewan Kunsil Nengeri ti dipenyadi  Menteri Besai, Datuk Seri Najib Tun Razak ditu, kemari.

Iya madah Sarawak laun ngenudukka diri dalam pemansang pengawa dagang temuai tang enggau sukung ke diberi perintah besai deka ngangkatka pemansang industri dagang temuai di menua tu.

“Sarawak, menua ke diuan mayuh macham pupu bansa enggau adat pesaka ke nyelai ari menua bukai, ke tau dipeda kita ari ajat sida baka malam tu,” ku iya.

Ku Taib, enti diperatika, temuai ke nemuai ngagai menua tu, ukai semina diau sehari-dua aja, tang dalam timpuh ke lama laban deka meda pemanah rumah panjai tauka rampa genturung pendiau kelimpah rindu meda adat pesaka pupu bansa di menua tu.

Dulu agi ari nya, Menteri Dagang Temuai enggau Adat Pesaka Malaysia, Dato Seri Nazri Abdul Aziz madah, Sarawak dipilih nyadi palan ATF 2014 laban pemanah adat bansa, rampa menua sereta diuan bemacham pupu bansa ke udah dikelala dunya.

Pia mega ku iya tu peluang mantaika makit aum, insentif, konvensyen enggau pengawa pemandang (MICE) ke disediaka Sarawak, ke nyadi siti ari Projek Puin Penama (EPPs), NKEA.

“Pengawa dagang nyadi pemerat industri dalam dunya kemaya hari tu. Enggau pengelantang bejalai meraka garis antara menua, iya nyadi pemerat industri ke mai penguntung, penatai pemisi sereta peluang pengawa.

“Beratika pemerat sereta kuasa pengawa dagang temuai begempung baka tu (ATF), ATI ngena rambai jaku ‘ASEAN-Sama Nyingkang Ngangkatka Pengawa Dagang Temuai (ASEAN-Advancing Tourism Together),” ku iya.

Iya madah, Malaysia berasai temegah ati nyambung semangat sereta adat ATF, ke ngena jaku rambai nya, nyadi penepan ngubah polisi sereta pemansang pengawa dagang temuai, lalu nyengkaum ngemanahka ekonomi sereta penuduk pengawa rama entara kaban ASEAN.

“Tu ka ngaga Malaysia, menua ke dipilih ulih temuai ngiga peneleba, ‘Malaysia Truly Asia and South East Asia – Feel the Warmth’,” ku Nazri.

Sama bisi ngulu pengawa nya kemari, Menteri Besai Datuk Seri Mohd Najib Razak enggau bini iya, Datin Seri Rosmah Mansor, bini Kepala Menteri Sarawak, Puan Sri Ragad Kurdi-Taib, Menteri Pengawa Dagang Sarawak, Datuk Amar Abang Johari Tun Openg enggau Menteri Pengawa Dagang Temuai ASEAN ke bukai.

Atur pengawa ATF 2014 dipasuk 1,380 penyereta ari 23 buah menua, ke udah diatur berengkah ari 15 Jan nyentuk ke 23 Jan, beratika ngiga peluang baru dalam pemansang pengawa dagang temuai lalu meda sekeda inisiatif pengawa dagang temuai enggau perambu ulih nyukung ‘mantra’ (Tourism Conserves, Preserves enggau Protects).

Kelimpah ari Menteri Pengawa Dagang ASEAN enggau tuai-tuai opis perintah, raban penyereta ATF 2014 bukai nyengkaum raban pengawa pemandang Gerempung Pengawa Dagang Temuai Nasional ASEAN (NTO), orang ke meli sereta nyual pakej dagang temuai, nyengkaum ‘Travel Exchange’ (TRAVEX) ari serata dunya.