Anda di sini

Peranak menua pesisir dilalau muka akaun

Advertisement

Kena ngemuntangka pengawa ngagihka Bantu Rayat 1Malaysia 3.0, ku Dennis

MIRI: Kaban Kunsil Nengeri (ADUN) Telang Usan Dennis Ngau ngelalau peranak di kandang menua Baram muka akaun bank dikena ngemuntangka pengawa ngagihka Bantu Rayat 1Malaysia (BR1M) 3.0.

Iya madah nya dikena ngenyampatka proses nerima bantu nya.

“Aku meransang peranak di menua pesisir kelebih agi ba ulu Baram muka akaun bank dulu dikena nerima BR1M 3.0 ila,” ku iya ditu kemari.

Pengudah akaun bank dibuka ku iya, sida patut ngaduka baru pasal penerang nya ngagai OpisPengumpul Chukai Dalam Nengeri (LHDN).

Taja pia ku iya, ngagai sida ti enda sempat (muka akaun) enda patut irau ati laban bantu nya tetap deka diberi ngagai ke patut.

“Anang irau, ukai reti iya nadai akaun lalu ukai reti iya nadai BR1M…anang salah anggap tauka saru…bantu tetap diberi,” ku iya.

Ku iya, bantu nya diberi nengah chara sebedau tu iya nya diberi mata duit.

Ngenang pengawa ngaduka baru penerang diri nengah online , Dennis madah, nya pedis deka dipejalaika peranak ke diau di menua ulu.

“Kitai nemu laban mayuh ke bedau nemu ngena kereban internet sereta chara ngena, nya alai ke diatu semina nengah opis LHDN ke semak,” ku iya.

Dennis enggau tu mega ngingatka peranak menua ngambika nemu maya ngisi peminta BR1M 2014 ditutup.

“Anang enda ingat….sereta ngingatka pangan diri, enti enda diri empu ke rugi lalu anang nyalahka orang bukai,” ku iya.

Penerang pasal BR1M 2014, dipelaba berengkah dibayar bulan Februari sereta dipelaba meri penguntung ngagai 5.9 juta ruang bilik serta dua juta iku orang bujang.

Menteri Besai Datuk Seri Najib Tun Razak madahka pengawa ngagihka BR1M 2014 ngagai ruang bilik teulihka penatai pemisi tiap bulan RM3,000 ke baruh ditikika ari RM500 ngagai RM650, lalu sida ke bujang ti beumur 21 taun enggau ke atas ti teulihka penatai pemisi enda lebih RM2,000 sebulan ditikika ari RM250 ngagai RM300.

Orang tuai ti beumur 60 taun ke atas enggau diau ke diri mega deka nerima bantu ti ditiki ari RM500 ngagai RM650.

Advertisement