Anda di sini

Malaysia ulih diperintah orang bukai enti rayat lemi

NYENDIAKA DIRI: Kamal (kiba) ngelekatka pangkat ngagai nembiak PLKN ba Kem PLKN Junaco Park ditu, kemari

SIBU: Enda bepenemu, nadai pengelandik, kelalu lemi lalu nadai pengering diri tau nejuka rayat Malaysia diperintah orang baru baka dulu suba.

Kepala Polis Menua Sibu ACP Mohd Kamal Kordi madah, pekara tu ulih dipeda ba menua bukai ke diuan rayat ke lemi diperintah tauka dipegai menua ke kering agi.

“Tang menua ke chukup penemu, ngembuan pengelandik ba teknologi sereta kaya nyadi perintah ngagai menua ke diuan rayat ti lubah mansang.

“Nya alai, pekara tu patut nyadika lalau kitai rayat Malaysia nyikap diri enggau pengeransing napi macham leman penguji nyerumba singkang ubah global,” ku iya.

Nambahka nya ku Kamal, rayat ke ngembuan ulah pechaya ke pengelebih diri empu mega tau nyungkakka menua Malaysia besemekih enggau menua ke bukai.

“Kitai ulih ngetanka pengelikun menua tu lalu pekara ke manah endang bepanggai ba kitai empu ke nyadi rayat Malaysia,” ku iya.

Kamal mantaika penemu nya maya bejadika Progam Latih Ke Bansa (PLKN) Kumpulan 1 Siri 11/2014 di Kem PLKN Junaco Park ditu, kemari.

Kelimpah ari nya ku Kamal, nembiak baru mega patut nyempulang diri enggau penemu ti chukup, pengering runding enggau fizikal dikena napi penguji jeman tu.

Ku iya, baikka nembiak indu tauka lelaki bela megai tanggungpengawa nentuka pengelikun menua seraya nyadika pelasar pemansang bansa enggau menua.

“Enti ba menua bukai, nembiak endang patut ngambi bagi ba latih baka tu ngambika semampai besedia napi sebarang pekara ti enda disadang nyadi.

“Ukai semina nya, nembiak dilatih enggau berat agi kelimpah bisi mega rayat ba menua bukai diberi latih baka tu dalam kandang beberapa taun enti dibida semina tiga bulan aja ba menua kitai,” pia ku iya madahka baru.

Kumpulan 1 Siri 11 tu mungkur 451 iku nembiak indu enggau lelaki lalu berengkah kena 4 Januari tu nyentuk ke 17 Mac ti deka datai.

Sama bela bisi datai ngulu pengawa tu kemari iya nya Sapit Komanden Pemesai Kem PLKN Junaco Park Kapten Cannedy Ijau Matalie, Sapit Komanden Latih Kem PLKN Junaco Park Mej (B) Wan Zulpakar Wan Majid enggau Direktor Kem PLKN Junaco Park, Kiu Siong Hii.