Anda di sini

Dagang temuai pengadung ekonomi dunya, ku Nazri

TUAI RUMAH 2015: Nazri (dua kiba) enggau Abang Johari (dua kanan) ngelawa sereta begambar ba palan pemandang ari menua Myanmar ti nyadi tuai rumah ATF taun 2015. — Gambar Kong Jun Liung

Kelimpah ari penyungkak penatai pemisi sektor nya mega nyendiaka mayuh pengawa puang ngagai peranak menua

KUCHING: Bepelasarka ripot ari United Nation (UN), industri dagang temuai sebengkah ari 10 sektor ti beguna bendar dikena ngadungka ekonomi dunya.

Menteri Dagang Temuai enggau Main Asal, Datuk Seri Mohammad Nazri Abdul Aziz madah, dagang temuai besai reti ba penyungkak ekonomi seraya dikena ngangkatka pemanah rampa menua.

“Sebengkah ripot UN apin lama, ngelai dagang temuai sebengkah ari 10 sektor ti amat beguna kena ngadungka ekonomi dunya.

“Dagang temuai ulih nyadi ejen ubah lumur satu dalam ubah ngagai Ekonomi Gadung, ngansak pengerembai ekonomi sereta nyendiaka pengawa puang.

“Nambahka nya, dikena ngadungka ekonomi dunya kitai patut ngena pemanah rampa menua enggau engkeman, ngurangka pengerusak rampa menua sereta ngangkatka pemereti temuai pasal rampa menua.

“Kena nyapai juluk tu, kitai patut bisi atur ti manah tang lebih beguna agi kitai bekempit gawa kena nambahka pemereti tauka penemu, penyereta enggau komitmen semua orang ari menua ASEAN sereta ari menua bukai di dunya tu,” ku iya.

Nazri mansutka pekara nya dalam jaku pengelalu pengerami bejadika Aum Dagang Temuai ASEAN iya nya pengerami besai dalam Forum Dagang Temuai ASEAN (ATF) 2014 ti diatur ba Palan Aum Besai Borneo (BCCK) ditu kemari.

Pengerami nya dipenyadika Menteri Dagang Temuai, Datuk Amar Abang Johari Tun Openg ti ngarika Kepala Menteri Pehin Sri Abdul Taib Mahmud.

Nandu baru iya madah, kitai nengah industri dagang temuai nyadi sebengkah sektor besai ti ngangkatka ekonomi dunya enggau menua ASEAN.

Nya berindik ari mayuh menua di dunya tu milih pemansang industri dagang temuai nyadi pekera besai dikena ngemansangka ekonomi enggau bansa.

Ku Nazri, nengah pengawa besaup, kitai ulih nempa mayuh agi pengawa ti diatur begulai kelimpah ari ngerembaika skala ekonomi enggau nambahka penegap.

“Seraya ngenyakah sereta ngemansangka dagang temuai begulai, kitai mega ngenyumbukka mayuh pengawa puang sereta ngenyungkak penatai pemisi enti dibandingka enggau pengereja pengawa betanam betupi.

“Kitai mega teulihka pemalat empas ba pengawa pengedut kaul sereta kerejasama seraya nyungkak pemanah penatai pemisi enggau nyaguka pengelantang pengidup,” ku iya.