KUCHING: Kompeni pengeluar semin tunggal di nengeri tu, Cahya Mata Sarawak (CMS) Cement Sdn Bhd (CMS Cement) dipinta nyendiaka rega semin ti patut ungkup peranak rumah panjai.
Chairman Parti Keadilan Rakyat (PKR) Nengeri Baru Bian madahka, kompeni nya ulih ngepun ngena inisiatif program tanggungpengawa rama korporat (CSR) dikena meri pulai sekeda untung ngagai raban bansa.
“Kitai ulih mereti rega urung lima ngagai semilan peratus nya amat patut pengudah ngira ungkus pengeluar ti majak nambah.
“Tang aku deka nemu sekalika kompeni nya bisi nyendiaka rega patut ungkup peranak rumah panjai…anggap meh nyadi program CSR,” ku iya ba aum pengarang berita ditu, kemari.
Baru ti mega Kaban Kunsil Nengeri (ADUN) Ba’Kelalan madah, pengelebih ti disediaka kompeni nya meri peluang ngagai peranak ti begunaka semin dikena ngemanahka rumah panjai sida.
“Peranak rumah panjai amat begunaka semin nya dikena ngaga enggau ngemanahka rumah sida,” ku iya.
CMS apin lama bisi madahka deka nikika rega semin berangkah 17 Februari tu dikena nampung ungkus pengeluar ti majak nambah sereta puku enggau juluk dikena ngenukuka guna semin di Sarawak ulih ditapi.
Direktor pengatur kompeni nya Datuk Richard Curtis madah, peniki rega nya meri pangka mimit ngagai pemeli enggau kaban kunsi ngambika piak ti bekaul ulih ngenegapka tikas puku ti diguna dalam industri.
Rega semin seruran niki ari taun 2009 ngagai 2013 taja pan penyampau semina 5.2 peratus taja pan ungkus pengeluar niki ngagai 14.5 peratus.
Dalam timpuh nya, produk dikena ngaga (rumah) ke bukai mega bisi niki rega ari 17 ngagai 70 peratus.