KEMEGAH: James ngelekatka pangkat Koperal ngagai seiku raban polis ba pengerami nya.
LUBOK ANTU: Balai Polis Engkilili nempa nama nyadi pemenang ‘Anugerah Balai Leaguetable’ ba Kategori D 2013.
Kepala Polis Pelilih Lubok Antu, DSP James Johnathan madah, gelar nya bepelasarka pemujur ba atur ngurangka penyalah berat, tikas servis ngagai mensia mayuh, aktiviti komuniti, ‘Policing’ enggau disiplin raban pengereja pengawa.
Ku iya, Balai Polis Engkilili ba penuduk tempat keempat pemadu manah ari 263 buah balai polis ke bisi ba serata menua Malaysia.
“Gelar tu udah diterima aku di Kuala Lumpur kena 8 Disember taun nyin lalu aku berasai temegah ati. Gelar tu ungkup kitai semua,” ku iya ba Gempuru Ninting Bulan keterubah taun tu di Indu Opis Polis Pelilih (IPD) Lubok Antu, bedau lama ke udah.
Ba pengerami nya, James nyuaka ‘Anugerah Perkhidmatan Cemerlang’ ngagai lapan iku raban IPD Lubok Antu kelimpah ngemujurka pengawa niki pangkat Koperal ngagai tiga iku raban ke bukai.
Kelimpah ari nya James mega ngelalau semua raban polis IPD Lubok Antu bejalaika tanggungpengawa enggau chakah agi sereta enda bechiping ke pengelikun rayat di pelilih menua tu.
Iya mega ngarapka tetiap raban mandangka ulah ti manah ngagai rayat ditu kena nyaga nama manah IPD Lubok Antu ba raban sida ninting hari.
“Aku ngarapka raban polis IPD Lubok Antu ulih ngedutka kaul kerejasama enggau rayat ditu kena nyaga tikas pengelikun ba menua tu,” ku iya.