Anda di sini

ASEAN diperansang beserakup dalam pemansang mudal mensia

Advertisement

NARIT ATI: Nazri (duduk : kiba) enggau Abang Johari ngemataka seiku orang bejual pemakai enggau ai irup ti ngambi bagi ba pengawa pemansang ATF 2014 mandangka chara ngaga Teh Tarik ti mega sebengkah ari produk penarit temuai ke Malaysia. — Gambar Muhd Rais Sanusi.

Kena ngemansangka kualiti servis enggau inovasi ngambika ulih mantu nyungkak pengerembai industri dagang temuai

KUCHING: Menua ASEAN diperansang beserakup dalam pemansang mudal mensia ti bekaul enggau kualiti servis sereta inovasi dikena ngangkatka industri dagang temuai (ASEAN).

Menteri Dagang Temuai Sarawak, Datuk Amar Abang Johari Tun Openg madah, pemansang bekaul enggau kualiti servis enggau inovasi nya ulih mantu nyungkakka pemansang ekonomi nengah industri dagang temuai.

Iya madah pekara nya dikemeran sereta dikemerat industri dagang temuai Sarawak nengah kerejasama begulai enggau Universiti Teknologi MARA (UiTM) enggau Universiti UCSI di Kuching ti nyendiaka latih baka program betukar nembiak.

“Sebengkah pekara ti amat beguna dikena kitai terus maju dalam industri dagang temuai iya nya ngemeran sereta ngemeratka pemansang mudal mensia.

“Beduduk ari pemesai guna industri dagang temuai dalam pengawa nyungkakka pemansang ekonomi Sarawak, kami ngangkat tauka ngenegapka agi mudal mensia ti bekaul enggau kualiti servis enggau inovasi.

“Enti bekaul enggau ASEAN, perintah Sarawak seruran deka nerima inisiatif tauka chara ti ulih ngangkatka pemanah program ti bekaul enggau industri hospitaliti, ambika banding baka program betukar nembiak ngambika sida lebih nemu sereta neleba diri enggau jalai pengidup tauka adat enggau main asal ba menua ASEAN,” ku iya.

Abang Johari mansutka penemu nya lebuh bejaku seraya bejadika Aum Dagang Temuai ASEAN, sebengkah pengerami besai dalam Forum Dagang Temuai ASEAN 2014 ti diatur ba Palan Aum Borneo Kuching (BCCK) ditu, pagi kemari.

Abang Johari ti mega Menteri Pengawa Berumah ngarika Kepala Menteri Pehin Sri Abdul Taib bejadika Travex – Forum Dagang Temuai ASEAN 2014 ti ngena rambai jaku “Advancing Tourism Together”.

Bejaku baru iya madah, perintah Malaysia nengah Opis Menteri Dagang Temuai enggau Main Asal ngembuan penyakah dalam merambu mayuh macham program di baruh Program Transformasyen Perintah, beduduk ari ti ngembuan juluk deka narit 36 miliun iku temuai sereta dipelabaka nerima sepenyampau RM168 biliun lebuh manggai 2020.

Ba taun 2013, Sarawak nerima urung 4.1 miliun iku temuai, nengah mayuh atur program ti dipejalaika perintah nyengkaum ngelakuka Culture, Adventure and Nature (CAN) sereta MICE (Meeting, Insentive, Conference, Exhibition) dikena narit temuai ke nengeri tu, ku iya.

“Nengah ASEAN sereta bepelasarka BIMP EAGA, kami bisi ngerapitka kaul sereta kerejasama ukai semina ti bekaul enggau industri dagang temuai aja tang mega nyengkaum pekara pelajar, perubat, dagang enggau pemeranak puku,” ku iya.

Bisi datai ba pengerami nya kemari, Menteri Dagang Temuai enggau Main Asal, Datuk Seri Mohammad Nazri Abdul Aziz enggau kebukai.

Advertisement