KUCHING: Raban Polis Marin Wilayah 5 (PPM W5) Sarawak mujur ngerampas ai bisa ti berega RM56,700 asil pengawa nyerekap di sebuah gudang di Jalai Kampung Rantau Panjang, Batu Kawa ditu, apin lama.
Bepelasarka penerang orang mayuh, pengawa nyerekap nya disereta lapan iku raban PPM W5 nya udah tetemuka 5,040 butul arak Tiger enggau 50 kutak tauka 1,200 butul arak Budweiser asil pengawa meresa sebuah setor keterubah ti enda bekunchi.
Asil pengawa meresa setor kedua, PPM W5 udah tetemuka 300 kutak tauka7,200 tin Leo Smooth enggau Great Taste lalu ke semua nya dipelabaka nadai bechukai.
Kepala ba bagi Pengawa Mansik/Operasi PPM W5, Sarawak DSP Mohd Razlin Abdul Manaf ba aum pengarang berita di Pangkalan Polis Marin, Bintawa madah, pengawa nyerekap enggau nangkap barang nya dipejalaika 17 Januari tu tadi, iya nya sebengkah pemujur raban polis marin bulan tu.
Ku iya, keterubah, 7 Januari tu tadi raban polis marin di Bintulu nengah Akta KPDNKK udah mujur nangkap sereta ngerampas barang ti berega RM690,000, lalu kedua kena 15 Januari di Sibu nengah Ordinan Perhutanan Nengeri Sarawak ti berega RM6,000.
“Bepelasarka penerang orang mayuh, raban polis marin udah nyerekap urung pukul 10 pagi ba endur baka ti udah dipadahka sereta tetemuka beberapa ai bisa ti dipelabaka nadai chukai.
“Maya nyerekap nya, seiku lelaki peranak menua tu ti beumur 47 taun udah ditan ngambika mantu pengawa pemansik pengudah nadai nunjukka dokumen kastam sereta dipelabaka nyimpan ai bisa ti nadai chukai.
“Kes ti udah diberi ngagai piak kastam lalu pansik deka dipejalaika piak kastam dibaruh Akta Kastam 1967,” ku iya.
Ngenang pekara bekaul nya, Razlin madahka raban polis marin deka bejalaika Ops Tango Papa tengan bulan tu dikena muntanka pengawa mai barang ti nadai pemendar enggau semua penyalah.
Ops Tango Papa ku iya dipejalaika seminggu sebedau enggau pengudah Taun Baru China, baka ti seruran dipejalaika tiap kali maya musim pengerami enggau kemisi sekula.
Raban nya ku iya, deka seruran ngangkatka pengawa meresa seraya begunaka kerejasama ari orang mayuh meri penerang ngambika orang ti salah ulih ditangkap.
“Aku ngarika piak komandar PPM W5, amat ngarapka sereta nerima manah penerang ari orang mayuh ngambika piak kami ulih bejalaika penagawa nitihka patut,” ku iya.
Berebak enggau nya, PPM W5 udah mujur nangkap sereta ngerampas berega RM5.69 juta lebih sepemanjai taun 2013 ti mungkur mayuh macham penyalah.