KUCHING: Kompeni bilun AirAsia ensana meri kelala sebengkah atur penerebai terus bilun nya ari Kuching ke Kota Bharu, Kelantan.
Penerebai tiga kali seminggu nya belabuh seharitu, 22 March lalu nyadi penerebai ke-8 bilun AirAsia ari Kuching, sereta nyadi bilun keterubah mai penumpang terus ke Pantai Timur semenanjung nya.
Beserimbai enggau tu, AirAsia deka meri tikit pechuma ngagai mensia mayuh ke ulih dilawa nengah buking ‘online’ di www.airasia.com berengkah ari 20 Januari tu tadi ngagai 2 Februari.
Penumpang semina mayar chukai enggau bayar bukai ari RM29 ba sekali penerebai. Sida ke bulih penuduk tauka tikit pechuma tau terebai ngena bilun nya berengkah 22 March taun tu nyentuk 31Januari taun baru tu ila.
Kepala Komersil AirAsia Berhad Kenny Wong madah bilun nya terebai ari Kuching ngagai Kota Bharu, genap hari Dua, Empat enggau Enam, angkat ari Kuching urung pukul 7.00 pagi lalu dipelaba sangkai di Kota Bharu pukul 8.55am, ari Kota Bharu deka angkat pukul 9.20 pagi lalu datai di Kuching pukul 11.20 pagi.
“AirAsia komited mantu komiti, ngerapitka tikas entara Malaysia Timur enggau semenanjung Malaysia. Bedau lama tu tadi kami ngepunka penerebai terus bilun AirAsia ari Kota Kinabalu ke Kota Bharu, kena bulan November tu tadi, lalu timbal ke diterima kami chukup manah.
“Tu mandangka bisi peminta nyambung kededua Sabah enggau Sarawak terus ngagai Pantai Timur Semenanjung, lalu kami berasai temegah ati meri kelala penerebai bilun kami ari Kuching terus Kota Bharu, lalu kami ngarapka timbal pan sama,” ku iya.
Beserimbai enggau Taun Nemuai Ke Malaysia Taun 2014 (VMY2014) ke benung dipejalaika diatu, iya ngarapka pengandal ati muka penerebai tu deka meri peluang pengabis manah ngagai temuai antarabansa ari kededua piak meda pemanah Malaysia.
“Timpuh penerebai ke pandak tu mega deka meri peneleba meda sereta ngasaika pemayuh adat, pemanah orang sereta pemakai di Malaysia; lalu AirAsia berasai temegah ati nyadi bilun keterubah terebai entara menua tu, setipak enggau VMY2014,” ku Wong.
AirAsia diatu udah terebai ari Kuching ngagai utara semenanjung ke bisi penerebai terus ngagai Pulau Pinang, sereta selatan semenanjung penerebai terus ke Johor Bahru. Kompeni bilun tu mega berasai temegah ati madahka sida iya mujur negutka kaul sereta nyambung penerebai entara menua tu, enggau 427 penerebai tiap minggu, lalu nyendiaka penyambung penerebai bilun dalam kandang sitak menua di Malaysia Timur.
Pemadah pasal promosyen ke bisi di AirAsia tau dilawa nengah lambar Twitter sida iya ba www.twitter.com/AirAsia enggau lambar Facebook.