Anda di sini

Rev. Fr. Richard deka berengkah nyadi Bishop Miri 25 Jan tu ila

Advertisement

MIRI: Diocese Roman Katolik Miri muka lambar baru lebuh Rev. Fr. Ri­chard Ng (gambar) , 47, ari Archdiocese Kuching dipadu mangku pengawa Bishop Miri berengkah 25 Januari tu.

Rev. Fr. Richard Ng dichiri kena 30 Oktober 2013 di Vatican, nganti Rt. Rev. Anthony Lee Kok Hin ke udah bejalaika pengawa iya di Miri kenyau 36 taun ke udah.

Rev. Fr. Richard Ng bulih pelajar ari St Peter College, Pusat Seminari di Archdio­cese, Kuching lalu ditetapka nyadi paderi kena 1995.

Dalam bulan September 1999, iya dianjung belajarka Bup Kudus di Pontifical Biblical Institute di Rome lalu graduet dalam taun 2003 dalam bidang ‘Licentiate in Sacred Scriptures’.

Sepenatai iya di Kuching, iya diberi tanggungpengawa ngajar Sacred Scriptures di St Peter College kelimpah ari ke nyadi pematih di seminarian.

Dalam taun 2008, iya di­padu nyadi rektor di St. Pe­ter College nyentuk diatu iya nyau nyadi Bishop Miri.

Raban Roman Katholik deka ngintu pengerami St. Paul kena 25 Januari lalu beserimbai enggau nya atur pengawa ordinasyen Rev. Fr. Richard Ng nyadi Bishop Miri mega diatur.

Sebengkah pengawa sem­biang dikena nyelamat iya deka diatur di Stadium Tertutup Miri kena 25 Januari belabuh ari pukul 9.00 pagi.

Naka ke diatu tujuh iku archbishop, 10 bishop, 82 paderi, lima deakon, be­berapa iku ketuai Gereja Protestan, orang politik enggau kira-kira 600 iku kaban Katolik ari serata Malaysia, Singapore enggau Brunei disadang datai ngulu sembiang nya ila.

 

Advertisement