Anda di sini

Ngelarika polis, terejun ke sungai mai nyawa

Advertisement

MERESA: Pemesai perubat meresa seraya ngenukuka pengidup enggau pengenda Tan di tempat penyadi.

MIRI: Seiku lelaki beumur 42 taun parai udah iya terejun ngagai Sungai Pujut Adong meya ngelarika diri ari polis lemai Hari Minggu tu tadi.

Pekara tu diripotka nyadi urung pukul 3.30 ngalih hari.

Dipechayaka lelaki tu, Tan Boo Hut, gawa nyadi operator kren, dulu agi ari tu bisi rembus ngagai Pujut Adong sama enggau kaling bukai bemain ‘Holo’ pia mega nyabung enda belisin.

Nemu diri kena gagai polis, semua saspek nyengkaum niang tu bekesebar ngelarika diri.

Tan terejun ke dalam sungai ngambika enda kena tangkap.

Enda memukai, seiku peranak dia, Nelson Mawang, 20, bisi meda Tan kual-kual minta bantu di puak ai.

“Aku terejun nguji matak iya (Tan) ke tebing sungai alu ngengkah iya dalam perau…nguji ngidup iya,” ku Nelson ngerandau The Borneo Post lebuh ke ditemu dia ensana.

Laban nasit ke enda manah, Tan nyau enda benyawa.

Tan ninggalka bini iya, Slyvia Norita Nuyan, 32, dua iku anak indu beumur tujuh enggau lapan taun.

Sebuah ambulen ari Sepital Miri datai ngagai tempat penyadi.

Sida ari sepital nya udah nya besambung ngagai polis.

Advertisement