SIBU: Opis Menteri Dagang Dalam Nengeri, Gerempung Kerejasama enggau Pekara Bebeli Barang (KPDNKK) pampang Sibu deka chakah agi bejalaika pengawa matau pedaja ngambi semampai nitihka atur belama.
Ketuai KPDNKK Sibu Balraj Singh madah, operasyen ke sebaka ti digelar Ops Harga bela diatur ba serata menua tu.
“Raban opis kami deka suah matau ngambika orang ti bedaja enda sepeneka nikika rega barang lebih agi maya nyauka sema hari besai Baka Taun Baru China ke deka diintu enda lama agi kelimpah Gawai Dayak enggau Hari Raya,” ku iya madah ngagai pengarang berita, kemari.
Dulu agi ari nya, bisi 30 iku raban KPNDKK Sibu bejalai matau rega barang ba Makit Sentral Sibu ditu.
Pengawa nya betuaika Sapit Ketuai KPDNKK Sibu Ganda Jirap belabuh ari pukul 8.00 pagi.
Maya tu mega Balraj madah, gaya hari ke suah ujan bisi ngaul rega ikan nyengkaum ikan duai burak enggau sayur.
“Taja taja pan baka nya, rega ke ditiki nya enda bangat besai lalu melabaka rega tu deka pulai baka selama dalam kandang seminggu agi,” ku iya nerangka.
Balraj mega madah, rega telu mengkang baka selama taja peminta majak nambah lebih agi ari kedai ruti enggau restoren nyerumba hari besai ti deka diintu enda lama agi.
Kelimpah ari nya, iya mega bisi madah, KPDNKK Sibu deka seruran matau orang ke bedaja di kali lima.
Pia mega ku iya, iya ngelalau sida ke ngempu salon dipinta mandangka rega servis sida enggau nyemetak.
Berebak enggau tu, Balraj minta mensia mayuh ngambika betelefon ngagai KPDNKK Sibu nengah lumur 084-329202 tauka 084-335622 nyema bisi tetemuka rega barang dijual bangat kelalu mar tauka bisi tetemuka pengawa bejual ti ngelanggar atur.