KUCHING: Raban menteri dagang temuai menua ASEAN pechaya industri nya deka majak ngerembai pengudah sempekat Langit Tebuka ASEAN dipesetuju rambau ASEAN Tourism Forum Ke-17 ditu.
Bejaku ngarika raban menteri ASEAN ba sebengkah aum pengarang berita begulai kemari, Menteri Dagang Temuai Malaysia Dato Seri Mohamed Nazri madah, sempekat Langit Tebuka ASEAN nerima sukung ari semua 10 iku raban menteri ASEAN.
“Ba randau kitai kemari (Hari Minggu), semua menteri menua ASEAN enggau pengari ke datai ngulu forum Ke-17 meri sukung ngagai sempekat Langit Tebuka ASEAN ti dipejurai.
“Nambahka nya Asean Dialogue Partners ti tebal agi bejuraika pekara servis enggau menua China, Kesatuan Eropah sereta Republik Korea mega benung diperundingka enggau manah.
“Pemutus randau Protokol 2 senentang ‘Exchange of 5th Freedom Air Traffic Right’ entara menua dalam ASEAN enggau China nengah sempekat Pengangkut Langit ASEAN-China deka mantu ngerembaika dagang sereta ngangkatka atur penyambung dalam kandang menua ASEAN,’ku iya.
Nazri mega madah menua ASEAN mengkang nyadi palan dagang temuai ti dikerindu ke alai ba taun 2013 penyampau 90.2 juta orang udah nemua ngagai menua ASEAN, nambah 12 peratus ari taun 2012.
Nyaut tanya pemberita, Nazri madah ba taun 2013, penyampau 28 juta orang dirikod udah datai nemuai ngagai Malaysia ke alai iya nyadang menua tu (Malaysia) deka teulihka RM76 biliun ba taun 2014 ari industri dagang temuai.
Ba kaul ke sama, Menteri Dagang Temuai Indonesia Dr. Mari Elka madah kompeni penerbai bilun menua nya Garuda Airlines deka ngatur mayuh agi penerbai ngagai mengeri dalam ASEAN.
Ku iya, Indonnesia deka nentuka mayuh agi penerbai bilun, Garuda Airlines diatur ngambika tau nyambung, menua tu ngagai sekeda mengeri bukai lalu dikearap ulih nyaup ngeranchak industri dagang temuai di rantau ASEAN.
“Kelimpah ari Garuda, kitai nyadang kompeni bilun bukai baka Air Asia, Lion Air enggau sekeda ke bukai deka mega nitihka singkang Garuda Airlines,” tandu iya.
Semua raban menteri nengah aum pengarang berita begulai nya ngelaluka pengawa manah ti udah dipejalai ASEAN-China Centre, ASEAN-Japan Centre enggau ASEAN-Korea Centre ti udah bebendar ngelaku industri dagang temuai menua ASEAn di China, Jepun enggau Korea.
Kelimpah ari nya, semua raban menteri ari tiap menua ASEAN mega setuju deka ngangkat atur penyambung darat enggau ai ba menua diri ungkup pemaik industri nya.